पोखरा । विभिन्न मुद्दामा फरार रहेका ४६ जना प्रतिवादी पक्राउ परेका छन् ।

मंसिर महिना (०१ देखि ३० गते सम्म) मा जिल्ला प्रहरी कार्यालय कास्की तथा मातहत प्रहरी कार्यालयबाट खटिएको प्रहरी टोलीले विभिन्न मुद्दामा फैसला भई कैद तथा जरिवाना भुक्तान गर्न बाँकी ४६ जना फरार प्रतिवादीहरुलाई पक्राउ गरेको हो ।

पक्राउ पर्नेमा चेक अनादार मुद्दामा २९ जना, चोरी मुद्दामा २ जना, जुवा मुद्दामा ३ जना, दुशित तथा न्यून स्तरको खाद्यपदार्थ उत्पादन तथा विक्री वितरण मुद्दामा १ जना, सार्वजनिक स्थानमा अभद्र व्यवहार मुद्दामा ४ जना, जालसाझी मुद्दामा ४ जना, साधारण चोरी मुद्दामा १ जना, सवारी अंगभंग मुद्दामा १ जना, अभद्र व्यवहार मुद्दामा १ जना रहेका छन् ।

उनीहरुबाट रु.२ लाख १२ हजार २०० जरिवाना तथा ४ महिना १६ दिन कैद भुक्तान गरिएको जिल्ला प्रहरी कार्यालय कास्कीले जनाएको छ ।
पक्राउ गरेका उनीहरुलाई कास्की जिल्ला अदालतमा बुझाईएको प्रहरीले जनाएको छ ।