पोखरा महानगरपालिकाका नगर प्रहरी प्रमुख प्रहरी निरीक्षक पुरुषोत्तम थापामाथि अपशब्द बोल्दै हातपात गरेको आरोपमा एक पुरुष पक्राउ परेका छन् ।

शुक्रबार दिउसो साढे १ बजे महेन्द्रपुलस्थित सार्वजनिक स्थानमा सडक पेटीमा रहेका व्यापारिक प्रयोजनको सामाग्रीहरु हटाउने क्रममा थापामाथि हातपात भएको प्रहरीले जनाएको छ ।

पोखरा महानगरपालिका वडा नं. ४ गैह्रापाटनका ४५ वर्षीय गोविन्द प्रसाद घिमिरेले विभिन्न किसिमका अपशव्द प्रयोग गरी गालिगलौज र हातपात गरेको भन्दै थापाले उजुरी गरेको कास्की प्रहरीले जनाएको छ ।

आफूमाथि हातपात भएको भन्दै थापाले कास्की प्रहरीमा उजुरी दिएपछि घिमिरेलाई पक्राउ गरिएको कास्की प्रहरीका सूचना अधिकारी श्रवणकुमार विकले जानकारी दिए ।

पक्राउ परेका घिमिरेविरुद्ध सार्वजनिक हित स्वास्थ्य, सुरक्षा सुविधा तथा नैतिकता विरुद्धको कसुर (भद्र व्यवहार) मा दिन सात म्याद लिएर अनुसन्धान प्रक्रिया अघि बढाइएको प्रहरीले जनाएको छ ।