पोखरा महानगरपालिकाको मेयरमा निर्वाचित भएपछि धनराज आचार्यले पदबहालीसँगै गरेको पहिलो निर्णय नै पोखरालाई पर्यटनको राजधानी घोषणा गर्ने हो । अब यो योजनाले मूर्तरुप पाउन लागेको मेयर आचार्यले शनिबार पोखरामा आयोजित कार्यक्रममा जानकारी गराएका छन् ।

यसै हप्ता मंगलबार प्रदेश राजधानी पोखरालाई पर्यटकीय राजधानी बनाउने अभियानलाई सफल बनाउन गण्डकी प्रदेश नीति तथा योजना आयोगका उपाध्यक्ष डा। कृष्ण देवकोटाको अध्यक्षतामा अध्ययन समिति नै गठन गरिएको थियो ।

मेयर आचार्यले नेपाल कुष्ठरोग निवारण संघको शनिबार पोखरामा भएको ५१ औं सभामा बोल्दै पोखरालाई पर्यटकीय राजधानी घोषणाका लागि सबै प्रक्रिया पूरा हुने चरणमा रहेको जनाए ।

कार्यक्रममा प्रमुख आचार्यले संघले आगामी दिनमा कार्यक्षेत्र विस्तार लैजानुपर्ने बताए । ‘कुष्ठरोगबाट मात्र हेरेर भएन् । समय अनुसार परिवर्तन हुँदै छालाका अन्य रोगमा पनि काम गर्ने गरी सेवा विस्तार गर्ने विषयमा केन्द्रीय सभामा कुरा हुनेछ भन्ने आशा लिएको छ,’ उनले भने ।

सरकारले स्वास्थ्य क्षेत्रमा ठूलो रकम छुट्याएको अवस्थामा विरामी हुनुभन्दा रोग नलाग्नेतर्फ सचेत गराउने कार्यक्रम ल्याउनुपर्ने उनको भनाइ थियो । संघको आगामी कार्यमा महानगर हातेमालो गरेर अघि बढ्न तयार रहेको उनले सुनाए ।

संघले ५१ औं केन्द्रीय सभा पोखरामा गरेको हो । शनिबार पोखरामा विविध कार्यक्रम गरी केन्द्रीय सभा सम्पन्न गर्ने क्रममा विभिन्न व्यक्तित्वहरुलाई सम्मान गरिएको थियो ।

संस्थापक उपाध्यक्ष डा. गौरीशंकरलाल दासलाई सम्मान पत्रले सम्मान गरिएको थियो । उमेरले १ सय वर्ष नाघेका उनलाई जेष्ठ सदस्यका रुपमा सम्मान गरिएको हो । यस्तै आजिवन सदस्यहरुलाई प्रमाणपत्र पनि वितरण गरिएको थियो ।

सोही कार्यक्रममा पोखरा आरोग्य आश्रममा आश्रित जेष्ठ कुष्ठरोग प्रभावितहरुलाई पनि सम्मान गरिएको थियो । धर्मी देवकोटा, लक्ष्मी गुरुङ र फूलमाया अधिकारीलाई नगद ५ हजार रुपैयाँसहित सम्मान गरिएको हो । यस्तै, आश्रमलाई सहयोग गर्ने बौद्ध उपासिका संघ, बुद्ध प्रतिष्ठान, लायन्स क्लब अफ पोखरा समर्पण, लायन्स क्लब अफ पोखरा सिर्जना चौतारी, हरियोखर्क अस्पताल, पोखरा लेडी जेसिस, ढुंगेसाँघु युवा क्लब र शिवलाल आचार्यलाई पनि सम्मान गरिएको थियो ।

नेपाल उद्योग वाणिज्य महासंघका पूर्व अध्यक्ष आनन्दराज मुल्मीले स्वयंसेवी संस्थाका रुपमा संघले पु¥याएको योगदान अतुलनिय रहेको उनले बताए । उनले पनि संघले अन्य रोगका क्षेत्रमा काम गर्नुपर्नेमा जोड दिए ।

संस्थाको परिचयसहित कामका बारेमा महासचिव डा. रामकुमार श्रेष्ठले प्रस्तुति दिएका थिए । डा. अध्यक्ष खगेन्द्रबहादुर श्रेष्ठ, उपाध्यक्षद्वय नारायण शर्मा र हिरा उदासँगै उपमहासचिव कृष्णलाल श्रेष्ठले संघले आगामी दिनमा अझै उत्कृष्ट कार्य गर्दै अघि बढ्ने बताए ।

कुष्ठरोग प्रभावितहरुको संख्या बर्सेनि बढ्दो

कुष्ठरोग नियन्यण तथा अपांगता व्यवस्थापन शाखा, टेकूले सार्वजनिक गरेको तथ्यांक अनुसार नेपालमा कुष्ठरोग प्रभावितहरुको संख्या बर्सेनि बढ्दो छ । पछिल्लो ३ वर्षको आंकडा हेर्दा कुष्ठ प्रभावितहरु बढेको भेटिएको हो ।

आर्थिक वर्ष २०७५/०७६ मा १ हजार ८ सय ५३ नयाँ प्रभावित फेला परेकोमा अर्को वर्ष त्यो बढेर २ हजार १ सय ७३ पुगेको हो ।

पोखरा आरोग्य आश्रमका कार्यालय प्रमुख सुभाष तझ्या पनि बर्सेनि प्रभावितहरुको संख्या बढ्दै गएको बताउँछन् । कुष्ठ प्रभावितहरुको हेरचाह र औषधोपचारको क्षेत्रमा नेपाल कुष्ठरोग निवारण संघले काम गरिरहेको छ । २०२६ साल जेठ २२ गते स्थापना भएको संघले यो क्षेत्रमा काम गर्दै आएको छ । संघ स्थापनाको धेरैपछि सरकार जोडिन आएको संघका केन्द्रीय अध्यक्ष डा. खगेन्द्रबहादुर श्रेष्ठले बताए ।

संघ मातहत पोखरा र काठमाडौंमा आश्रम नै बनाएर प्रभावितहरुलाई राखिएको छ । सँगै विभिन्न अस्पतालहरुको सहकार्यमा उनीहरुको उपचारमा पनि सघाएको छ । यो बाहेक धनगढी, नेपालगञ्ज र धरानमा शाखा कार्यालय स्थापना गरी सेवा दिइरहेको छ ।