कास्की। कास्की प्रहरीले कौडा खेल्दै गरेका ६ जनालाई हतियार सहित पक्राउ गरेको छ।

पोखरा महानगरपालिका -२२ चिसाखोला स्थित ५२ वर्षीय भेष बहादुर गुरुङको घरमा कौडा खेल्दै गरेका ६ जनालाई हतियार सहित पक्राउ गरिएको प्रदेश प्रहरी कार्यालय पोखराले जनाएको छ।

प्रहरीका अनुसार गएराती १२:५० बजेको समयमा भेष बहादुर गुरुङको घरको आँगनमा कौंडा खेलेको भन्ने सूचनाको आधारमा प्रहरीको टोली खटिएकोमा प्रहरी आएको थाहा पाएपछि उनीहरू भाग्ने प्रयास गरेका थिए।

प्रहरीले उनीहरूको साथबाट ८२ हजार ८ सय २५ नगद र १६ थान कौडा लगायत केही जिन्सी सामान वरामद गरेको थियो भने, गुरुङको घर खान तलासी गर्दा कोठामा लुकाई राखेको अवस्थामा लाईसेन्स नभएको हर्नेट र सोको गोली २४ राउण्ड र १ थान म्यागजिन फेला पारेको थियो।

पक्राउ परेका उनीहरूमाथि आवश्यक अनुसन्धान भइरहेको प्रदेश प्रहरी कार्यालयका प्रहरी वरिष्ठ उपरीक्षक शारदा प्रसाद चौधरीले जानकारी दिए।