पोखरा । अनेरास्ववियु जिल्ला कमिटी कास्कीले पोखरा महानगरपालिका वडा नम्बर २९ घोतघोतेमा दृष्टिविहीन निवासमा भएको आगलागीबाट क्षति भएका पीडितलाई सामग्री वितरण गरेको छ ।

शनिबार पीडितको क्षेत्रमै पुगेर १५ हजार बराबर राहत सामग्री वितरण गरिएको अनेरास्ववियु कास्कीका अध्यक्ष सन्तोष पोखरेलले जानकारी दिए ।

राहतमा चामल, दाल, तरकारी, दालमोठ, चिउरा, भुजा लगायत अन्य करिव एक हप्तालाई पुग्ने गरी प्रदान गरिएको अध्यक्ष पोखरेलले बताए ।

स्थानीय जनप्रतिनिधिहरुको रोहवरमा राहत सामग्री वितरण गरेको हो । कार्यक्रममा अनेरास्ववियु केन्द्रिय लेखा आयोगको अध्यक्ष सुनिल तिमिल्सिनासहित अनेरास्ववियुको जिल्ला स्तरीय नेताको उपस्थिति थियो ।

अनेरास्ववियु कास्कीले अस्थायी टहरा निर्माणका लागि अनेरास्ववियु जनश्रमदान गर्न पनि तयार रहेको बताएको छ ।

गत बुधबार राति दृष्टिविहीन समूह देउसीभैलो खेल्न निस्कँदा राति ९ बजेतिर आश्रममा आगलागी भएको थियो । नगद ८ लाखसहित करिब ३० लाख क्षति दृष्टिविहीन समूहको भएको थियो । ५ कोठे एक तले घरसमेत जलेर नष्ट भएको थियो ।

घर भाडामा लिएर अपांगता मैत्री समाजले सञ्चालन गरेको आश्रम, बिक्री गर्न राखिएका अगरबत्ती, कपुर, पेन्सिन, डटपेनसहित सामग्री, लत्ताकपडा र नगद गत शनिबार भएको आगलागीले नष्ट भएको थियो । उक्त आश्रममा करिब ३० जना बस्छन् ।

आश्रय लिने र उद्यमका काम गर्ने आश्रम नै जलेपछि देशका विभिन्न ठाउँबाट आएका दृष्टिविहीनहरु चिन्तामा छन् ।

नेकपा एमालेका स्थायी कमिटि सदस्य एवं पूर्व गृहमन्त्री तथा गण्डकीका निवर्तमान मुख्यमन्त्री खगराज अधिकारीले पनि भोलिपल्टै पुगी आगलागीबाट भएको क्षतिबारे बुझेका थिए ।

सम्बन्धित समाचारः

पोखराको दृष्टिविहीन आश्रममा आगलागी, नगद ८ लाखसहित ३० लाख बढी क्षति