पोखरा । एट टु नाईन एफसी पोखराले अन्डर १५ फुटबल खेलकी उदयीमान राष्ट्रिय खेलाडी एशोदा बोहरालाई बुधबार एक लाख नगद सहयोग गरेको छ ।

क्लबले सेभेन ए साईड फुटबल प्रतियोगिता गरी वचत भएको उक्त रकम गण्डकी प्रदेश सामाजिक विकास तथा स्वास्थ्य मन्त्री शुसिला सिम्खडाले घाइते खेलाडी एशोदाका काका जितेन्द्र बहादुर बोहरालाई पोखरामा नगद हस्तान्तरण गरेकी हुन् ।

मन्त्री सिम्खडाले दुःख परेको बेलामा आबश्यक सहयोग गर्नु नै मानव सेवा भएको बताउँदै युवाहरुले खेलकुदको बिकासमा लाग्नु भएकोमा धन्यवाद दिइन् ।

पोखरामा बन्द प्रशिक्षणमा रहेको बेला बोहरालाई स्पाइनल कर्ड सम्बन्धि समस्या भएको थियो । क्लबले असोज १७ देखि २२ गतेसम्म सेभेन ए साईड फ्ुटबल प्रतियोगिता गरी बचत रहेको रकम बोहरालाई प्रदान गरिएको क्लबका उपाध्यक्ष धनराज तामाङले बताए ।

सो अवसरमा क्लबका सचिव नवराज गुरुङले संचालन गरेको कार्यक्रममा क्लबका अध्यक्ष राजेश गुरुङ, रकम संकलनमा सक्रिय सुजु रानाभाट, सरस्वती आधारभूत बिद्यालयका प्रधानाध्यापक रुद्रबहादुर रानाभाट, मन्त्रालयका सचिव र पत्रकारहरुको उपस्थिति रहेको थियो ।