धादिङको त्रिपुरासन्दुरी गाउँपालिका सल्यान्टारमा मंगलबार राति मोटरसाइकल दुर्घटनामा परी दुई युवक घाइते भएका छन् ।

बगैँचा स्थित गाउँपालिका कार्यालय नजिकै बेलगाउँचोकमा भएको दुर्घटनामा परी वडा नं. १ रानीपौवाका २२ वर्षीय रोशन परियार र सोहि ठाउँका २२ वर्षकै सन्दीप श्रेष्ठ घाइते भएका हुन् ।

घाइते रोशनको अवस्था अत्यन्त चिन्ताजनक रहेको सल्यान्टार प्रहरी चौकीका प्रमुख सई विष्णु बहादुर नेपालीले गण्डकन्यूजलाई जानकारी दिए । उनले भने– ‘रोशनको अवस्था अत्यन्त चिन्ताजनक छ । सन्दीपको चाहिँ मध्यम छ । दुवैको जिल्ला अस्पताल रिफर भएको छ ।’

रोशन मोटरसाइकल पछाडि बसेका थिए । मोटरसाइकल चालक सन्दीप श्रेष्ठको अवस्था मध्यम छ । दुवैलाई एम्बुलेन्समार्फत भर्खरै जिल्ला अस्पताल धादिङ लगिँदैछ ।

घटना साढे ९ बजे भएको हो । उनीहरु सवार बा ५० प ७१३८ सिभिआर होण्डा बाइक रोकिराखेको ना६त २७५८ नम्बरको ट्याक्टरमा ठक्कर खाएको घटनास्थलबाट राजकुमार राजाले जानकारी दिए । बाइकको ठक्करले ट्याक्टर नै पल्टिएको थियो ।

दुर्घटना हुनेबित्तिकै दुवैलाई सल्यान्टार स्वास्थ्य केन्द्रमा लगिएको थियो । स्वास्थ्य चौकीको एम्बुलेन्स नचलेपछि खहरेबाट एम्बुलेन्स बोलाउनुपर्दा डेढ घण्टा ढिलो हुन पुगेको थियो । त्यसपछि, स्थानियले गाउँपालिका र स्वास्थ्य चौकी विरूद्ध आक्रोश व्यक्त गरेका थिए ।

दुर्घटनामा परी मोटरसाइकल क्षतविक्षत भएको छ । प्रहरीको टोली घटनास्थल पुगी अनुसन्धान सुरु गरेको छ ।

तीब्र गति र मापसे गरी सवारी नचलाउन सूचित गरिएको छ ।