पोखरा महानगरपालिकाले प्लाष्टिकजन्य माला, फूल गुच्छाको उत्पादन आयात र बिक्री वितरणमा रोक लगाएको छ । महानगरपालिका उपप्रमुख एवं उपभोक्ता हित संरक्षण समितिका संयोजक मञ्जुदेवी गुरुङको नेतृत्वमा सोमबार पोखराका १२ वटा पसलहरुमा अनुगमन गर्दै रोक लगाएको हो ।

महानगरले गत वर्ष पनि अनुुगमन गरेर बिक्रीवितरण नगर्न अनुरोध गरेको थियो । गत गर्ष बिक्री वितरण नगर्न अनुरोध गरिएका ७ पसललाई कारबाही र ४० हजार जरिवाना गरिएको छ भने १ लाख ९ हजार ९ सय १० रुपैयाँ बराबरको फूलका माला जफत गरिएको सहकारी उद्योग शाखाका अधिकृत ऋषिराम सापकोटाले जानकारी दिए ।

अनुुगमनका क्रममा पोखरा वडा नं. ९ मा रहेको जयमा पूजा सामाग्री भण्डारलाई १० हजार जरिवाना र पसलबाट ९० हजार ४ सय ६० रुपैयाँ बराबरको फूलका माला जफत गरिएको छ । त्यस्तै, पोखरा–३ को माता मनकामना पूजा सामाग्री भण्डारलाई ५ हजार जरिवाना र ७ हजार बराबरको फूलका माला जफत गरिएको छ ।

पोखरा ३ कै किरण ट्रेड लिंकलाई ५ हजार जरिवाना र ८ हजार ५ सय बराबरको फूलको माला जफत गरिएको छ भने पोखराको महेन्द्रपुलमा रहेको सुधा साहुको पूजा सामाग्री भण्डारलाई ५ हजार जरिवाना र ३ हजार मूल्य बराबरको फूलको माला जफत गरिएको छ । यस्तै, पोखरा–३ को खाल्सा गिफ्ट हाउसलाई ५ हजार जरिवाना र ६ सय ५० रुपैयाँ मूल्य बराबरको फूलको माला जफत गरिएको अधिकृत सापकोटाले जानकारी दिए ।

पोखरा–९ स्थित नमोः शिवाय पूजा सामाग्री भण्डारलाई ५ हजार जरिवाना गरिएको छ भने पोखरा १ बगरमा रहेको स्वीट एण्ड चार्ट रेष्टुुरेन्टलाई ५ हजार जरिवाना र ३ सय बराबरको रसबरी नष्ट गरिएको छ । स्वीट हाउसमा रसबरीमा झिंगा, पुरानो चास्नी र फोहोर रहेकाले नष्ट गरि जरिवाना गरिएको हो । अन्य पाँच पसलहरुलाई सचेत गराउनुको साथै आगामी दिनमा प्लाष्टिक जन्य फूलगुच्छा, माला बिक्री वितरण र भण्डार नगर्न निर्देशन दिइएको छ ।

अनुुगमनमा महानगरपालिका उपप्रमुख मञ्जुुदेवी गुुरुङ, महानगर आर्थिक विकास महाशाखा प्रमुुख मनहर कडरिया, जिल्ला प्रशासन कार्यालयका प्रशासकीय अधिकृत मुुकुन्दराज पौडेल, सहकारी तथा उद्योग शाखा प्रमुख भरतराज पौडेल, गुणस्तर तथा नापतौल कार्यालय प्रतिनिधि विपिन पुरी, महानगर वन तथा वातावरण विज्ञ सन्तोष भटराई, महानगर खाद्य निरिक्षक स्मिता पौडेल, महानगर सहकारी उद्योग शाखा अधिकृत ऋषिराम सापकोटा, पत्रकारद्वय गौरव त्रिपाठी र बिनोद ढुंगानाको सहभागी थिए ।

पोखरा महानगरका उपप्रमुख मञ्जुदेवी गुरुङले प्लाष्टिकजन्य सामग्रीले यहाँको वातावरणमा असर परेको पर्ने भएकाले अनुगमन गरिएको बताइन् । उनले अघिल्लो वर्ष व्यसायीले गुनासो गरेपछि अहिले आफैले हटाएर सहयोग गरेको बताइन् । चाडपर्वमा प्लाष्टिकजन्य फूलहरुको ब्यापार बढि हुने भएकाले अनुगमन गरेका हौँ – उहाँले भनिन् , ‘गत वर्ष सचेत गराइएका केही ब्यापारीलाई जरिवानासहित फूलका माला जफत गरेका छौँ ।’

महानगर आर्थिक विकास महाशाखा प्रमुख मनोहर कडरियाले सानोदेखि होलसेल पसलसम्म अनुगमन गरिएको बताए । प्लाष्टिकजन्य सामग्री नेपाल बाहिरबाट आयात हुने र अर्थतन्त्र बाहिरिने तथा मानव जीवनमा समेत नकारात्मक प्रभाव पर्ने भएकाले रोक लगाइएको आर्थिक विकास महाशाखा प्रमुख मनोहर कडरियाले बताए । ‘प्लाष्टिकजन्य फूलमाला विक्री वितरणमा रोक लगाउँदा स्थानीय फूलले बजार पाउने र यसले वातावरणमा पार्ने नकरात्मक प्रभावलाई कम गर्छ ।’

नेपाल सरकार वन तथा वातावरण मन्त्रालयले वातावरण सरक्षण ऐन २०७६ को दफा १५ को उपदफा ६ ले दिएको अधिकार प्रयोग गरी २०७९ साउन १२ गते राजपत्रमा सुुचना प्रकाशित गरि सोही मितिदेखि प्लाष्टिक जन्य फूलका गुुच्छा उत्पादन आयात, बिक्रीवितरण वा भण्डार गर्न पूर्ण रुपमा रोक लगाउने निर्णय गरेको छ ।

नेपाल सरकारको उक्त निर्णय विपरित कुनै कार्य गरेको पाइएमा वातावरण संरक्षण ऐन २०७६ को दफा २२ को उपदफा ४ को खण्ड (क) वा (ख) बमोजिम वातावरण निरिक्षकबाट १५ हजारदेखि २० हजारसम्म जरिवाना हुने व्यवस्था रहेको छ ।