पोखरा–१७, विरौटामा रहेको घारीकुलो बचत तथा ऋण सहकारीको आयोजना शनिबार मधुमेह तथा रगतमा हुने खरा बोसो(टिजी) सित्तैमा जाँच गरिएको छ । युनाइटेड रेफरेन्स ल्याबोरेटरी बिरौटा शाखाको प्राविधिक सहयोगमा भएको शिविरमा २ सय ७ जनाले सित्तैमा जाँच सेवा लिएका छन् ।

कार्यक्रममा वरिष्ठ फिजिसियन डा कृष्णराज अधिकारीले स्वस्थ जीवन सबैभन्दा ठूलो सम्पत्ति भएको उल्लेख गर्दै रोग लाग्नै नदिन उचित जीवन शैली र बेला बेलामा परीक्षण गर्न आग्रह गरे । रोग लागिहाले समयमै उपचार गर्न र जीवनशैली, खानपिनमा परितर्वन गर्न आग्रह गरे ।

‘मधुमेह, थाइराइडसहित नसर्ने रोगहरुको प्रकोप बढ्दै गएको छ । पूर्वसावधानी र उचित औषधोपचार गर्ने हो भने रोगको पीडा, आर्थिक नोक्सानी र मानसिक पीडाबाट बाच्न सकिन्छ,’ उनले भने । सो अवसरमा थाइराइडको रगत जाँचमा ६० र अन्य अरु सबै प्रकारका जाँचमा ५० प्रतिशत छुट दिइएको थियो ।

युआरएल विरौटा अध्यक्ष विमला भण्डारीले सहकारी, सामाजिक संघ, संस्थाले स्वास्थ्यमा चासो दिएर यस खालका कार्यक्रम गर्नु निकै सकारात्मक कुरा भएको जनाइन् । युआरएलले व्यवसायमात्र नभई सामाजिक उत्तरदायित्वसमेत निर्वाह गरी प्रदेशकै अग्रणी प्रयोगशालाको दायित्व निर्वाह गरिरहेको उनको भनाइ छ ।

सहकारीका अध्यक्ष पुरन गिरीको अध्यक्ष्तामा भएको कार्यक्रममा सहकारीका उपाध्यक्ष कुमार बस्नेत, सचिव पवित्रा सुवेदी भण्डारी, कार्यक्रम संयोजक द्रौपदी बराल आचार्य लगायतले बोलेका थिए ।

युआरएलले नेपालीका मुख्य चाडपर्वलाई मध्यनजर गरी चाडपर्व विशेष अफरमा २० शाखाबाटै छुट दिइरहेको छ । गण्डकी प्रदेशकै पहिलो र एकमात्र आइएसओ ९००ः २०१५ प्राप्त युआरएलमा कात्तिक महिनाभरि युरिक एसिडको जाँच सित्तैमा र अरु सबै प्रकारका जाँचमा ३० प्रतिशत छुट दिइएको छ ।

महान् पर्वका बेला नेपालीलाई सुलभ दरमै स्वास्थ्य जाँचको अवसर दिन चाडपर्व अफर ल्याइएको युआरएलका प्रबन्ध निर्देशक गणेश कोइराला बताउँछन् । युआरएलले स्थापना कालदेखि नै आफैं र विभिन्न संघ, संस्थासँग सहकार्य गरी अहिलेसम्म डेढ सयभन्दा बढी निशुल्क शिविर आयोजना गरिसकेको छ ।