काठमाण्डौ। अक्टाेबर महिनामा नेपालमा १ लाख १७ हजार जनाभन्दा धेरै पर्यटक नेपाल आएका छन् ।

नेपाल पर्यटन बाेर्डका अनुसार अक्टाेबरमा १ लाख १७ हजार ३ सय ६ जना पर्यटक आएका छन् । यो संख्या काेराेना महामारी शुरु हुनुअघि सन् २०१९ काे तुलनामा ६ प्रतिशतले धेरै हाे ।

नेपाल भ्रमणमा आउने मध्ये सबैभन्दा धेरै पर्यटक छिमेकी देश भारतका छन्।अक्टाेबरमा मात्र भारतबाट १८ हजार ४ सय ८० जना पर्यटक आएका छन् ।

यस्तै अमेरिकाबाट १४ हजार ८ सय ७९, बेलायतबाट ८ हजार २ सय १७, चीनबाट ६ हजार ८ सय ८०, अस्ट्रेलियाबाट ६ हजार ७५, जर्मनीबाट ५ हजार ९ सय १६, फ्रान्सबाट ५ हजार २ सय ७१, बङ्गलादेशबाट ४ हजार २ सय ९२, श्रीलङ्काबाट २ हजार ५ सय ७ र इटालीबाट २ हजार ४ सय ६७ जना पर्यटक आएका छन् ।

पर्यटक आगमन बढेसँगै पर्यटन व्यवसाय कोभिड अगाडिकै अवस्थामा फर्कन थालेको छ । मनाङ, मुस्ताङ लगायतका गन्तव्यमा पर्यटकको उच्च चापले व्यवसायीले पहिले होटल बुक गरेर मात्र पर्यटकलाई आउन सल्लाह दिएका छन्।