पोखरा । युएनडिपि नेपाल तथा नेपाल पर्यटन बोर्डको सहकार्यमा ग्लोबल ट्राभल एण्ड टुरिजम पार्टनर नेपाल र टुरिजम रिसर्च एण्ड ट्रेनिङ इन्स्टिच्युटद्वारा काठमाडौंमा हालै सम्पन्न राष्ट्रिय पर्यटन सम्मेलनमा आयोजित विभिन्न विधासँग सम्बन्धित प्रतियोगितामा पोखरा–१७, विरौटामा अवस्थित बालोदय माध्यमिक विद्यालयले नेशनल च्याम्पियनको उपाधि हात पारेको छ ।

उक्त सम्मेलनमा साँस्कृतिक नृत्य प्रतियोगिता, पर्यटन सम्बन्धी रिसर्च रिपोर्ट र पावर पोइन्ट प्रेजेन्टेशन कम्पिटिशन तथा ट्राभल फोटो कन्टेस्टका तीन वटै विधाहरुमा बालोदय माध्यमिक विद्यालयका विद्यार्र्थीहरुले सर्वोत्कृष्ट प्रस्तुति गरी न्याशनल च्याम्पियन बन्न सफल भएका हुन् ।

साँस्कृतिक नृत्य प्रतियोगितामा कक्षा ११ मा अध्ययनरत विद्यार्थीहरू प्रेणा गुरुङ, स्नेहा पुन, एन्जिला गुरुङ, दक्षिणा बराल, नवराज गुरुङ र विजय चालिसेले प्रथम स्थान हासिल गर्न सफल भएका छन भने पर्यटन थिममा तयार पारिएको रिसर्च रिपोर्ट र पावरपोइन्ट प्रेजेन्टेशन कम्पिटिशन कक्षा ११ का विद्यार्र्थीद्वय दक्षिणा बराल र विजय चालिसेले जितेका छन् ।

प्रतियोगिताका विजयी विद्यार्र्थीहरू एवम् विद्यालयलाई नगद पुरस्कार, ट्रफी, मेडल तथा प्रमाणपत्र प्रदान गरिएको छ । पावरपोइन्ट प्रेजेन्टेशन कम्पिटिशनकी विजयी छात्रा दक्षिणा बराल आगामी नोभेम्बर महिनामा दुबईमा हुने अन्तर्राष्ट्रिय प्रतियोगिताका लागि छानिएकी छन् ।

यसै गरी कार्यक्रमको अर्को विधा जिटिटिपि ट्राभल फोटो कन्टेस्टमा कक्षा १२ मा अध्ययनरत छात्रा मेनुका विकले प्रथम पुरस्कार एक सय अमेरिकी डलर सहित मेडल र प्रमाणपत्र प्राप्त गरेकी छन । उनले खिचेको फोटो अन्तर्राष्ट्रिय प्रतियोगिताका लागि समेत छनौट भएको छ ।

कार्यक्रममा अन्तर्राष्ट्रिय टुरिजम स्पेसलिष्ट लिजा चोग्याललाई विशेष सल्लाहाकारमा चयन गरिएको थियो भने पर्यटन अभियन्ता सचिन न्यौपाने तथा सिर्जना ओलीलाई टुरिजम युथ एम्बेस्टर, गत वर्षकी कन्फरेन्सकी विजेता अर्पना भण्डारी र गायिका रोजा फुयाललाई टुरिजम स्टुडेन्ट एम्बेस्टर घोषणा गरिएको थियो ।

साथै मधेस प्रदेशको कला, सँस्कृति र पर्यावरणको क्षेत्रमा योगदान गर्नुभएका देव नारायण मण्डललाई सम्मान गर्दै गैडाकोटको विजय सामुदायिक शिक्षा सदनको टुरिजम क्लबलाई वेस्ट टुरिजम क्लब र गठ्ठाघरको ग्लोबल पाठशालाको टुरिजम क्लबलाई एक्टिभ टुरिजम क्लब अवार्डबाट सम्मान गरिएको थियो ।

रसियन कल्चर सेन्टर, काठमाडौमा संचालित उक्त सम्मेलनमा प्रमुख अतिथि पुर्व पर्यटन तथा नागरिक उड्ययन मन्त्रालयका सचिव केदार बहादुर अधिकारीले समृद्धीको आधार पर्यटन हुन सक्ने विषयलाई थप स्पष्ट पारेका थिए ।

त्यसै गरी टुरिजम बोर्डका निर्देशक मणिराम लामिछानेले पर्यटन सचेतना र पर्यटनको महत्वका बारेमा प्रकाश पारेका थिए भने टिआरटिआईका अध्यक्ष मदन कुमार बरालले पर्यटन क्लबको महत्वको विषयमा चर्चा गर्दै गत वर्ष टुरिजम बोर्ड, युएनडिपि र एसटिएलआरपिको सहयोगमा देशभरमा १८ वटा टुरिजम क्लब गठन गरेको एवम् यो वर्ष १०० वटा नेशनल सस्टेनेवल टुरिजम क्लबको गठन गरिरहेको जानकारी गराएका थिए ।