पोखरा उद्योग वाणिज्य संघले मानवीय स्वभाव वा असावधानीवश भएका सामान्य त्रुटिमा टेकेर व्यवसायीको चरित्रहत्या भएको भन्दै त्यसो नगर्न आग्रह गरेको छ ।

समयमा उपभोक्ता हितबारे सचेतनामूलक कार्यक्रम सञ्चालन नहुनु, दुकान–कबलमा भीडभाड भएको बेला अनुगमन गरिनुले सामान्य त्रुटि हुन सक्ने संघले प्रकाशन गरेको विज्ञप्तिमा उल्लेख छ ।

‘मानवीय स्वभाव वा असावधानीवशः भएका सामान्य त्रुटिमा टेकेर व्यवसायीको चरित्रहत्या हुने गरी प्रचार/प्रसार गराउनुलाई न्यायोचित मान्न नसकिने हाम्रो ठहर छ,’ संघ महासचिव बलराम आचार्यद्वारा हस्ताक्षरित विज्ञप्तिमा उल्लेख छ ।

संघले चाडबाडलाई लक्षित गरी आफ्ना उत्पादन र सेवामा यथासक्य छुटको व्यवस्था गर्न र गुणस्तरीय वस्तु एवं सेवा बिक्रीको व्यवस्था मिलाउन उद्योगी व्यवसायीलाई अनुरोध गरेको छ ।

विज्ञप्तिमा कानूनले तोकेभन्दा बढी नाफा नलिन, उपभोक्ता अधिकारप्रति सचेत रहन र म्याद गुज्रेका सामान खरिद–बिक्री नगर्न पनि आग्रह गरिएको छ । चाडबाडको समयमा ‘मौषमी’ रुपले गरिने बजार अनुगमनबाट व्यवसायीले असजह महसुस गर्ने विज्ञप्तिमा उल्लेख छ ।