काठमाडौं । नेपालबाट भैँसीको मासु आयात गर्न चीन तयार भएको छ । प्रधानमन्त्री पुष्पकमल दाहाल ‘प्रचण्ड’को चीन भ्रमणका बेला भएको प्रतिनिधिमण्डलस्तरीय बैठकमा उक्त सहमति बनेको हो ।

मंगलबार बिहान जारी संयुक्त विज्ञप्तिमा समेत यो विषय समेटिएको छ । चीनको भन्सारको सामान्य प्रशासन र नेपालको कृषि तथा पशुपन्छी विकास मन्त्रालयबीच उक्त सहमति भएको विज्ञप्तिमा उल्लेख छ ।

पकाएको भैँसीको मासु नेपालबाट आयात गर्न स्वीकृति प्रक्रियालाई तीव्रता दिन चीन तयार भएको विज्ञप्तिमा उल्लेख छ । यसले नेपालको व्यापार घाटा कम गर्ने विश्वास नेपाल र चीनले व्यक्त गरेका छन् ।

नेपाली उत्पादन चीन निर्यातका लागि सहजीकरण गर्न चीन सक्रिय कदम चाल्न तयार रहेको समेत उल्लेख छ । हाल नेपालबाट चीनमा घाँस निर्यात हुँदै आएको छ ।

यस्तै, चीनमा नेपाली अमिलो जातका फलफूल निर्यातका लागि आवश्यक पर्ने प्रमाणपत्र उपलब्ध गराउन र नेपालमा क्वारेन्टाइन प्रयोगशाला स्थापना गर्न पनि चीनले नेपाललाई सहयोग गर्न तयार भएको छ ।

साथै चीनले याक, नाक र च्याङ्ग्राको प्रजननका लागि पनि चीनले सहयोग गर्ने भएको छ ।