पोखरा । पोखरा महानगरपालिका खेलकुद विकास समितिको आयोजनामा अन्तर विद्यालयस्तरीय छात्र/छात्रा प्रतियोगिता सुरु भएको छ । पोखरा महानगरपालिका कबड्डी संघको प्राविधिक सहयोग र व्यवस्थापनमा पोखरा रंगशालास्थित बहुउद्देशीय कर्भड हलमा शुक्रबारदेखि प्रतियोगिता सुरु भएको हो ।

प्रतियोगिताको उद्घाटन कार्यक्रममा बोल्दै खेलकुद विकास समिति अध्यक्ष दीपकबहादुर गोदारले विद्यालयबाटै खेलाडी उत्पादन गर्न सक्दा राम्रो हुन्छ भनेर नै विद्यालयस्तरीय प्रतियोगितालाई जोड दिने गरेको बताए । उनले आफूहरुको चालु आर्थिक वर्षको वार्षिक कार्यक्रमअन्तर्गत यो पहिलो कार्यक्रम भएको सुनाए ।

महानगर कबड्डी संघका अध्यक्ष सागर भण्डारीले कबड्डी खेलमा चासो बढाउन र खेलाडी उत्पादन गर्न प्रतियोगिता अपरीहार्य रहेको बताए । उनले आफू नेतृत्वको संघले कबड्डी खेलको विकासका लागि सक्दो प्रयास गर्ने धारणा राखे ।

यो प्रतियोगितामा छात्रातर्फ २३ र छात्रतर्फ १७ गरेर ४० टिम सहभागी छन् । प्रतियोगिताको फाइनल आइतबार हुनेछ ।

प्रतियोगितामा छात्रा र छात्रतर्फ प्रथम र द्वितीय हुनेले क्रमशः १२/१२ हजार रुपैयाँ र ७/७ हजार रुपैयाँसहित ट्रफी, मेडल र प्रमाणपत्र पुरस्कार पाउने खेलकुद विकास समितिका सदस्य सचिव सुवास खड्काले जानकारी दिए । दुवै विधामा तृतीय हुने २/२ टोलीले ३५/३५ सय रुपैयाँसहित ट्रफी, मेडल र प्रमाणपत्र पुरस्कार पाउने छन् ।