श्रीकृष्ण जन्माष्टमी पर्वका अवसरमा पोखरा वडा नं. १५ मा बुधबार विशेष कार्यक्रम आयोजना भयो । भगवान् श्रीकृष्णको भक्तिभजनसहित शोभायात्रा निकालियो भने राति कृष्णझुला प्रस्तुत गरियो ।

पोखरा महानगरपालिका १५ नं. वडा कार्यालय र सिद्धेश्वर भजन मण्डल तथा संरक्षण समितिले संयुक्त रुपमा महाउत्सव एवं कृष्णझुला कार्यक्रम राखेको हो । बिहान सिद्धेश्वर शिव मन्दिरबाट भजनकीर्तनसहितको ¥याली कृष्ण मन्दिर बन क्याम्पस, हरियोखर्क अस्पताल, कृष्णमन्दिर घलेचोक, रामबजार, वडा कार्यालय हुँदै पुनः सिद्धेश्वर शिव मन्दिर पुगेर समापन गरियो ।

गण्डकी प्रदेश सांसद भीम कार्कीको प्रमुख आतिथ्यता एवं सिद्धेश्वर भजन मण्डल तथा संरक्षण समितिका अध्यक्ष हरिबहादुर थापाको अध्यक्षतामा कार्यक्रम भएको थियो ।

प्रमुख अतिथि कार्कीले सुसंस्कृत समाज निर्माणका लागि धर्म संस्कारको महत्वपूर्ण भूमिका रहने उल्लेख गरे । उनले अहिले हिन्दू धर्म र संस्कृतिमाथि आक्रमण भइरहेको भन्दै कानुनतः कुनै पनि धर्म विरुद्ध जान नहुने स्मरण गराए । यसका लागि सनातनी धर्मावलम्वीहरुमा जागरणको खाँचो रहेको औंल्याउँदै असत्य, अन्याय विरुद्ध भगवान श्रीकृष्ण झैं लाग्नुपर्ने बताए । संस्कृतिको रक्षार्थ लाग्नुपर्ने बेला आएकाे उनकाे भनाइ छ ।

विशिष्ट अतिथि वडा नं. १५ का अध्यक्ष तोरणबहादुर बानियाँले वडामा हुने गरेका हरेक कार्यहरुमा वडा कार्यालयको सहयोग रहने उल्लेख गरे । उनले पोखरा १५ मा विशेष कार्यक्रम हुँदा खुशी लागेको बताए ।

विशेष अतिथि प्रहरी तालिम केन्द्र पोखराका प्रहरी वरिष्ठ उपरीक्षक अरुण पौडेल, समितिका सचिव मोहनबहादुर भण्डारी लगायतले कार्यक्रममा बोलेका थिए ।

बुधबार साँझ कास्की क्षेत्र नं. २ का सांसद विद्या भट्टराईको प्रमुख आतिथ्यतामा कृष्ण झुला प्रस्तुत गरिएको अध्यक्ष बानियाँले जानकारी दिए । दिनभर सिद्धेश्वर शिव मन्दिर प्रांगणमा भजनकीर्तन भएको थियो ।

यसैगरी, पोखरा १५ स्थित श्री कृष्ण मन्दिर सञ्चालक समितिले पनि बुधबार शोभायात्रा निकालेको थियो । पोखरा १५ मा निकालिएका यी २ शोभा यात्रामा हजारौं पोखरेलीले सहभागिता जनाए ।

महिला समूह, टोलविकास संस्था, आमा समूह, विद्यालय, जातिय तथा धार्मिक संघसंस्थाको उल्लेख्य सहभागिता रहेको थियो । भजन समूह, पञ्चेबाजा तथा ब्याण्ड बाजा समूह पनि सहभागी थिए ।