पोखरा । कास्कीको माछापुच्छ्रे गाउँपालिकामा बाेलेरो जीप दुर्घटना हुँदा १० जना घाइते भएका छन् ।

पोखरा–माछापुच्छ्रे इदीखोला चल्ने ग ३ च ५८३८ नम्बरको उक्त जीप मणिलाल मार्गस्थित मर्दीपुलमा आइतबार दिउँसाे ३ बजेतिर दुर्घटनामा परेको हाे ।

जीपमा चालकसहित १० जना सवार रहेकोमा घाइतेमध्ये ८ जनाको अवस्था सामान्य रहेको र बाँकी २ जनाको पश्चिमाञ्चल अस्पतालमा उपचार भइरहेको माछापुच्छ्रे गाउँपालिका वडा नं. ९ का अध्यक्ष राजेन्द्र क्षेत्रीले जानकारी दिएका छन् । उनका अनुसार तीव्र गतिको जीप सडकको घुम्तीमा अनियन्त्रित भएर दुर्घटनामा परेको हो । जीप बाटोदेखि करिब १५ मिटर तल खसेर उत्तिसको रुखमा अल्झिएको उनले जनाए ।

घाइते सबै स्थानीय नै हुन् । सामान्य घाइतेहरुलाई उपचार पछि घर पठाइसकिएको वडाध्यक्ष क्षेत्रीले बताए । दुर्घटनामा जीप चालक गिरीधारी गौतम सहित यात्रुहरु हरिमाया भण्डारी, बिष्णु भण्डारी, गीता भण्डारी, बिनिता भण्डारी, सीता भण्डारी, लक्ष्मी भण्डारी र नानी भण्डारी उपचारपछि घर फर्किसकेकाे वडाध्यक्ष क्षत्रीले जनाए । गंगा अधिकारी र हिमाली गौतमकाे पाेखरामा उपचार भइरहेको र अवस्था खतरामुक्त रहेको छ ।