पाेखरा । फेवातालको सिमसार क्षेत्रमा अनधिकृत रुपमा बनिरहेको संरचनामाथि पोखरा महानगरपालिकाले डोजर चलाएको छ । व्यवसायी देवेन्द्र केसीले सिमसार पुरेर बनाएको संरचनामाथि महानगरले मंगलबार डोजर चलाएको हो । केसीले महानगरबाट कृषि प्रयोजनका लागि अनुमति लिएर धमाधम आवासीय संरचना खडा गरेका थिए ।

महानगरका अनुसार अनुमतिबेगर सिमसार क्षेत्रमा बनाएका सबै घडेरी संरचना भत्काउने तयारी गरेको हो । पोखरा महानगरले भू–उपयोग नीति ०७९ अनुसार जग्गा वर्गीकरण गर्दा फेवा सिमसार क्षेत्रको अधिकांश भाग आवासीय क्षेत्र तोकेको छ । महानगरले नै जग्गा वर्गीकरण गर्दा आवासीय बनाएकाले आफूले जग्गा सम्याएको निर्माण व्यवसायी बताउँछन् ।

पछिल्लो एक वर्षमा मात्रै सय रोपनीभन्दा बढी सिमसार प्लटिङ गरेर घडेरी बनाइएको छ । सिमसार पुर्ने काम अत्याधिक भएपछि अधिवक्ता मनोज घर्तीमगरले उच्च अदालत पोखरामा रिट दाएर गरेका थिए । उच्च अदालतले फेवाको चार किल्ला सीमांकनभित्र आवास निषेधित क्षेत्र तोक्न र सिमसार पुर्ने काम रोक्न अन्तरिम आदेश जारी गरेको छ ।