पोखरा । पृथ्वी राजमार्ग सडक खण्ड अन्तर्गत तनहुँ १ नम्बर निर्वाचन क्षेत्रमा भोलि आइतबार गाडी नचल्ने भएका छन् ।

भोलि हुने उपनिर्वाचनका कारण राजमार्ग सडक खण्ड सहितको १ नम्बर निर्वाचन क्षेत्र भित्रको सडकमा अत्यावश्यक बाहेकका गाडी चल्नलाई रोक लगाइएको हो ।

तनहुँका प्रमुख जिल्ला अधिकारी छवि रिजालले बिहान ५ बजेदेखि साँझ ५ बजेसम्म राजमार्गमा समेत गाडी चल्न नदिइने जानकारी दिए ।

पृथ्वी राजमार्ग हुँदै चल्ने रात्रीबसलाई आइतबार बिहान ४ बजेभित्र तनहुँ–१ को सडक पार गरिसक्न तनहुँ प्रशासनले आग्रह गरेको छ । पृथ्वी राजमार्ग बन्द हुँदा पोखरा भित्रिने तथा पोखराबाट बाहिरिने पर्यटक तथा सर्वसाधारण प्रभावित हुने भएका छन् ।

२०७९ मंसिरको निर्वाचनबाट प्रतिनिधि सभा सदस्य निर्वाचित रामचन्द्र पौडेल राष्ट्रपति निर्वाचित भएसँगै उक्त क्षेत्र रिक्त भएको थियो । रिक्त क्षेत्रमा उपनिर्वाचन हुन लागेको हो । उपनिर्वाचनमा कांग्रेसका गोविन्द भट्टराई, एमालेबाट सर्वेन्द्र खनाल र रास्वपाबाट स्वर्णिम वाग्ले लगायत अरु पार्टीहरुबाट समेत गरी ९ जना उम्मेदवार छन् ।