काठमाडौं । काठमाडौं महानगरपालिका मेयर बालेन शाहले काठमाडौंको हितमा काम नगर्ने भए राजधानी या सिंहदरबार अन्यत्र सार्न चुनौती दिएका छन् । बिहीबार सामाजिक सञ्जालमा स्टेटस लेख्दै शाहले सिंहदरबार या राजधानी नै अन्यत्र सारे पनि काठमाडौंबासीले कुनै आपत्ति नहुने बताएका छन् ।

उनले अगाडि लेखेका छन्- ‘कि काठमाडौंको हितमा काम गर्नुहोस्, कि सिंहदरबार अरु पालिकामा सार्नुहोस्, हामी काठमाडौंबासीलाई कुनै आपत्ति छैन । हामीलाई हाम्रो सम्पदा, संस्कृति, कला, सभ्यता चाहिन्छ, राजनीति होइन ।’

महानगरपालिकाका समस्या समाधानका लागि पटक-पटक प्रधानमन्त्री र सम्बन्धित अरु मन्त्रीलाई भेटेर आग्रह गर्दा पनि बेवास्ता भएपछि बालेनले चार दिनयता शीतलनिवास, बालुवाटार र सिंहदरबारको फोहोर उठाउन छाडेका छन् ।

बालेनले पटक पटक केन्द्र सरकारसँग समस्या समाधानका लागि सहयोग मागेपनि सहयोग नगरेको गुनासो गर्दै आइरहेका छन्।