काठमाण्डाै। अनलाइनबाट ठगी गरेको आरोपमा प्रहरीले नौ चिनियाँ सहित १० जना नेपाली नागरिकलाई पक्राउ गरेको छ । बूढानीलकण्ठ नगरपालिका ४ महादेवखोला र काठमाण्डाै महानगरपालिका ४ चण्डोल क्षेत्रबाट पक्राउ परेका उनीहरूलाई प्रहरीले आज बुधवार सार्वजनिक गरेको हो ।

उनीहरूले काठमाण्डाैका विभिन्न ठाउँमा घर भाडामा लिई अनलाइनबाट ठगी गर्ने गरेको पाइएको उपत्यका अपराध अनुसन्धान कार्यालय बानेश्वरका प्रमुख एसएसपी मनोज केसीले जानकारी दिए । गिरोहले ह्वाट्सएपमा अनलाइनमार्फत व्यवसायमा संलग्न भए ३० प्रतिशतसम्म फाइदा हुने भन्दै नेपाली नागरिकलाई ठग्ने गरेको उनले बताए ।

साथै उनीहरूले मासिक १० हजार दिने भन्दै नेपाली नागरिकको नाममा बैंक खाता खोलेर पीडितहरूलाई त्यही खातामा पैसा पठाउन लगाउने गरेको पाइएको छ ।

पक्राउ परेकाहरूको साथबाट १२ थान ल्यापटप, ७७ थान मोबाइल सेट लगायत विभिन्न उपकरणसहित चार लाख एक हजार आठ सय ८० रुपैयाँ पनि बरामद गरेको प्रहरीले जनाएको छ ।