नेकपा एकीकृत समाजवादीका दुई प्रभावशाली नेताले पार्टी परित्याग गरेका छन् ।

उपाध्यक्ष केदारप्रसाद न्यौपाने र स्थायी कमिटी सदस्य चुडामणि जंगली बिक आजदेखि औपचारिकरुपमा पार्टीबाट बाहिरिएका हुन् । आज बसेको समाजवादीको सचिवालय बैठकले उनीहरुले बुझाएको राजीनामा स्वीकृत गरेको महासचिव घनश्याम भुसालले जानकारी दिए । समाजवादी छाडेका नेताहरू पुरानै घर एमालेमा फर्किन लागेको चर्चा छ ।

राजीनामा दिएका नेता जंगली कास्कीका हुन् । जंगली नेकपा एकीकृत समाजवादीको गण्डकी प्रदेश सह–इन्चार्ज थिए । एमालेमा हुँदा उनी केन्द्रीय सदस्य थिए । जंगली दोस्रो संविधानसभा सदस्य हुन् ।

पार्टी नेतृत्वका गतिविधि चित्त नबुझेपछि उनले एक महिनाअघि नै राजीनामा पठाएको बुझिन्छ । राष्ट्रपति निर्वाचनका बेला जब माधव नेपाल स्वयं राष्ट्रपति नबनी अरू बनाउन हिँडे, त्यसलगत्तै पार्टीका शीर्षस्थ नेताहरू जाेडिएका फेसबुक ग्रुप च्याटमा जंगलीले अब पार्टीमा नरहने निर्णय गरेकाेबारे खुलासा गरेकाे निकटस्थहरू बताउँछन् ।