पोखरा। मुस्ताङको जोमसोमबाट पोखराका लागि छुटेको बस बुधबार (आज) बिहान कालिगण्डकीमा खसेको छ ।

बेनी–जोमसोम कोरला सडक अन्तर्गत थासाङ–३ धम्पुमा बिहान साढे ८ बजेतिर ना ७ ख ७४४० नम्बरको यात्रुबाहक बस दुर्घटना हुँदा १७ जना घाइते भएका छन्। बस सडकबाट ४० मिटर तल नदीमा खसेको थियो ।

दुर्घटनाको खबर लगत्तै जोसोमबाट प्रहरी नायव उपरिक्षक रविन्द्रनाथ पौडेल सहित प्रमुख जिल्ला अधिकारी, नेपाली सेना र प्रहरीसहितको टोली घटनास्थलमा पुगेर घाइतेलाई उद्धार गरिएको छ ।

दुर्घटनाका घाइतेलाई स्थानीय लेते स्वास्थ्य चौकीमा प्राथमिक उपचार गरी गम्भीर घाइते भएका ९ जनालाई गण्डकी अस्पताल पोखरामा रिफर गरिएको प्रहरीले जनाएको छ । बाँकी ८ जनाको स्वास्थ्य चौकीमै उपचार भइरहेको छ ।

निर्माणाधीन भएकाले साँघुरो सडकका कारण दुर्घटना भएको हुनसक्ने प्रहरीको अनुमान छ । बसमा म्याग्दी, पोखरा र भारतीयहरु सवार रहेको प्रहरीको भनाइ छ । दुर्घटनाको थप विस्तृत विवरण आउन बाँकी छ ।