पोखरा । नेपाल मगर संघ, कास्कीले मगर जातिको प्रमुख सांस्कृतिक चाड माघे सकरातीका अवसरमा आयोजना गरेको कास्की जिल्लास्तरीय अन्तर एकाइ ब्याडमिन्टन प्रतियोगिताको तयारी पूरा भएको छ ।

बिहीबारदेखि पोखरा रंगशालामा सुरु हुने प्रतियोगितामा नेपाल मगर संघ, कास्की अन्तर्गतका ३७ एकाइ समिति र विभिन्न भ्रातृसंगठनका तर्फबाट सहभागिता रहने प्रतियोगिता संयोजक क्या. भक्तबहादुर पुनमगरले जानकारी दिए । प्रतियोगितामा महिला र पुरुषका विभिन्न स्पर्धा राखिएको समेत संयोजक पुनमगरले बताए ।

शुक्रबारसम्म हुने प्रतियोगिताको सम्पूर्ण तयारी पूरा भएको संयोजक पुनमगरले जानकारी दिए । हरेक वर्ष मगर संघ, कास्कीले माघे सकरातीका अवसरमा ब्याडमिन्टन प्रतियोगिताको आयोजना गर्दै आएको सचिव रामबहादुर थापामगरले जानकारी दिए । सचिव थापामगरका अनुसार नेपाल मगर संघ, कास्कीले माघ १ गते माघे सकरातीका अवसरमा शुभकामना आदानप्रदान तथा विविध सांस्कृतिक कार्यक्रमको समेत आयोजना गरेको छ ।