काठमाडौं । नेपालगञ्जको भृकुटीनगरमा बम विष्फोट हुँदा २ जना घाइते भएका छन्।

विष्फोटमा परी नेत्रविक्रम चन्द विप्लव नेतृत्वको नेपाल कम्युनिस्ट पार्टीको अखिल क्रान्तिकारी बाँकेका जिल्ला अध्यक्ष डिल्ली बहादुर डिसी र कैलालीका धर्म बहादुर सुनार घाइते भएका छन्।

बुधबार बेलुकी नेपालगञ्ज उपमहानगरपालिका–१०, भृकुटीनगर स्थित दिवाकार मल्लको घरमा रहेको अध्यक्ष डिसीको कोठामा बम बनाउने क्रममा विस्फोट भएको प्रहरीले जनाएको छ।

प्रहरीका अनुसार कोठाभित्र बम बनाउँदै गर्दा प्रहरीले थाहा पाएपछि भाग्न खोज्दा प्रेसर कुकर बम विस्फोट भएको थियो । घाइते भएका बडुवालको अवस्था गम्भीर रहेको छ । घाइते दुवैजनाको भेरी अस्पतालमा उपचार भइरहेको छ ।

कोठाभित्र भेटिएको दुईवटा बममध्ये एउटा विस्फोट भएको र अर्को नेपाली सेनाको टोलीले निष्क्रिय बनाएको प्रहरीले जनाएको छ। भाडामा बस्दै आएका विप्लवका कार्यकर्ताले बम बनाइरहेका र थप अनुसन्धान भइरहेको जिल्ला प्रहरी कार्यालय बाँकेले जनाएको छ।