चितवन । चितवनको माडी नगरपालिका–४ घोसरीमा आफ्नै साथीले खुकुरी प्रहार गरी एक युवकको हत्या गरेका छन्।

शुक्रबार राती करिब १० बजेसँगै बसेर मदिरा सेवन गर्ने क्रममा विवाद भएपछि एक व्यक्तिले खुकुरी प्रहार गरी अन्दाजी ३३ वर्षीय जीवन नेपालीको हत्या गरेको माडी प्रहरीले जनाएको छ।

परियारको हत्या गरेको आरोपमा प्रहरीले उनकै साथी नवलपरासी बस्ने ३४ वर्षीय एक युवकलाई माडी–३ इनारबरुवाबाट पक्राउ गरेको छ। प्रहरीले पक्राउ गरिएका व्यक्तिको पहिचान खुलाएको छैन।

अनुसन्धानकै क्रम चलेकाले हत्या आरोपित व्यक्तिको पहिचान नखुलाइएको जिल्ला प्रहरी कार्यालय चितवनले जनाएको छ।

घटनास्थल नजिकै रगतमा लतपतिएको खुकुरी प्रहरीले फेला पारेको छ।

घटनास्थलमा अत्यधिक रगत बगेको र भुईंमा घोप्टिएको अवस्थामा नेपालीको शव भेटिएपछि स्थानीयले प्रहरीलाई राती १२ बजे खबर गरेका थिए।

नेपालीमाथि खुकुरी प्रहार गरेर भाग्ने क्रममा आरोपितले घोसरी गाउँमै घरमा सुतिरहेकी एक महिलाको गहना समेत लुटपाट गरेका थिए।