काठमाडौं । नेपालमा पहिलो पटक कोरोना भाइरस (कोभिड– १९) को नयाँ सब भेरियन्ट एक्सबीबी भेटिएको छ ।

स्वास्थ्य तथा जनसंख्या मन्त्रालयले राष्ट्रिय जनस्वास्थ्य प्रयोगशालामा गरिएको जिनोमिक सिक्वेन्सिङका क्रममा एक नेपालीमा कोरोना भाइरसको नयाँ सब भेरियन्ट एक्सबीबी भेटिएको पुष्टि गरेको हो ।

साउन २१ गतेदेखि १४ असोजसम्म कोभिड– १९ को विभिन्न उमेर समूहका व्यक्तिहरुबाट संकलित नमूनाहरूको छनोट गरी केही नमूनाको जिनोमिक सिक्वेन्सिङ गर्दा ओमिक्रोनको सबभेरियन्ट एक्सबीबी पुष्टि भएको मन्त्रालयले जनाएको छ ।

विश्व स्वास्थ्य संगठनका अनुसार अहिलेसम्म सो भेरियन्ट विश्वका २६ देशमा पुगिसकेको छ । यो विगतका भेरियन्ट र सब भेरियन्ट भन्दा निकै धेरै संक्रामक रहेको बताइएको छ ।

दीपावली, छठजस्ता पर्वमा हुने भीडभाडले संक्रमण अझै फैलन सक्ने भन्दै जनस्वास्थ्यका मापदण्डको पूर्ण पालना गर्न मन्त्रालयले आग्रह गरेको छ ।