पोखरा । नवौं राष्ट्रिय खेलकुद अन्तर्गत एथ्लेट्क्सिको ८ सय मिटर दौडमा पुरुषतर्फ त्रिभुवन आर्मी क्लबका सोमबहादुर कुमाल र महिलातर्फ एपीएफकी फुलमती रानाले स्वर्ण पदक जितेका छन् ।

उनीहरु दुवैको व्यक्तिगत तर्फ यो दोस्रो स्वर्ण पदक हो । यसअघि सोमबहादुरले ४०० मिटर दौडमा स्वर्णपदक जितेका थिए । यसैगरी फुलमतीले १५०० मिटर लौडमा पनि स्वर्णपदक जितेकी थिइन् ।

पोखरा रंगशालामा बुधबार निर्धारित दुरी १ मिनेट ५५ दशमलव ५२ सेकेन्डमा पूरा गर्दै सोमले स्वर्ण जितेका हुन् । नेपाल पुलिस क्लबका तेज बहादुर कार्कीले १ मिनेट ५५ दशमलव २१ सेकेन्ड टाइमिङ निकाल्दै रजत जिते । आर्मीका सुनिल सुनारले १ मिनेट ५५ दशमलव ५२ सेकेन्ड टाइमिङ सहित कास्य जिते ।

महिलातर्फको खेलमा निर्धारित दुरी २ मिनेट २७ दशमलव ३६ सेकेन्डमा पूरा गर्दै फूलमतिले स्वर्ण जितिन् । त्रिभुवन आर्मीकी सरस्वती भट्टराईले निर्धारित दुरी २ मिनेट २७ दशमलव ५० सेकेन्डमा पूरा गर्दै रजत जितिन् । आर्मीकै रेखा लिम्बुले २ मिनेट ३० दशमलव ४८ सेकेन्डमा दौड पूरा गर्दै कास्य जितिन् ।