पोखरा । पूर्व गृहमन्त्री खगराज अधिकारीले केही व्यक्तिको खराब प्रवृत्तिले व्यवस्थाको विरोध हुन थालेको बताएका छन् । उनले केही व्यक्तिहरु नराम्रा भए भन्दैमा व्यवस्थाकै विरोध गर्न नहुने उल्लेख गरे ।

पोलिटिकल साइन्स सोसाइटी नेपाल (पोस्सोन)द्वारा आयोजित ‘संविधान कार्यान्वयन सम्बन्धमा आसन्न निर्वाचनमा उम्मेद्वार छनौटका आधार’ विषयक अन्तरकृयात्मक गोष्ठीमा बोल्दै अधिकारीले भने – ‘हामी अहिले संविधान कार्यान्वयनकै क्रममा रहेको छौँ । देशमा भैरहेका सकारात्मक पक्षहरु भन्दा नकारात्मक कुराहरुको बढी उजागर गरिएको हुनाले संघियताका विषयमा नकारात्मक टिप्पणीहरु भै रहेको पाइएको छ । हामीले पाएको लोकतान्त्रिक सँघिय व्यवस्था राम्रो छ ।’

विशेष अतिथि गण्डकी प्रदेश सांसद मोहन रेग्मीले पूर्व मुख्यमन्त्री पृथ्वीसुब्बा गुरुङ र वर्तमान मुख्यमन्त्री कृष्णचन्द्र नेपालीको ५ वर्ष भित्र सरकार संचालन र विकास निर्माणलाई जस्ताको तस्तै छुट्याउन आग्रह गरे ।

गोष्ठीमा प्रा.डा. गिरधारी दाहालले नेपालका संविधानको इतिहास र आसन्न निर्वाचनमा उम्मेद्वार छनौटका आधारका विषयमा कार्यपत्र प्रस्तुत गरेका थिए ।

कार्यपत्रमा टिप्पणी गर्दै प्रा. डा. उमानाथ बरालले हाल राजनीतिलाई सेवा भन्दा पेशा बनाईएको, पैसाको वलमा चुनावमा टिकट पाउने र जित्ने प्रवृत्ति रहेको, वारम्बार एउटै व्यक्तिहरु चुनावमा उठ्ने लगायतका कारण योग्य व्यक्तिहरु उच्च राजनैतिक पदमा पुग्न नसकेको र राजनीतिमा सुधार हुन नसकेको बिचार राखे ।

राजनीतिशास्त्रका प्राध्यापक गजेन्द्र प्रसाद च्वाईले राजनीति गर्ने व्यक्तिमा नैतिकता र सादगीपन एकदमै आवश्यक रहेको कुरा औंल्याए । अहिलेका राजनैतिक दलका नेताहरु विलासी जिवन व्यतित गर्ने तर भन्ने बेलामा देश र जनताको लागि राजनीति गरेको भन्ने कुरा एकदमै नमिल्ने कुरा भएको जिकिर गरे । गोष्ठी कार्यक्रममा सहभागीहरुका जिज्ञासाहरु पनि सम्बन्धित विज्ञहरुले सम्बोधन गरेका थिए ।

राजनीतिशास्त्र बिभागका विभागीय प्रमुख प्रा. थान बहादुर क्षेत्रीले अहिलेका राजनैतिक दलहरु कुनै दर्शनबाट नभै बिचौलियाद्वारा चलेको कुराको उजागर गरेका थिए ।

संस्थाका अध्यक्ष सुवास ढुंगानाको अध्यक्षतामा भएको कार्यक्रममा संस्थाको स्थापनाको उद्देश्यका बारेमा संस्थाका सल्लाहकार वरिष्ठ अधिवक्ता माधवराज बास्तोलाले प्रकाश पारेका थिए ।

सहायक प्रमुख जिल्ला अधिकारी अनिल कुमार शाही र जनप्रिय क्याम्पसका सहायक क्याम्पस प्रमुख भेषराज वबरालले यस्तो वौद्विक संस्था जन्मेकोमा खुशी व्यक्त गर्दै संस्थाको उज्जल भविश्यको कामना गरे ।

वडा नं १ को वडा अध्यक्ष शाहारा प्रधान साथै जिल्ला सम्वन्वयन समिति कास्कीको कार्यकारी अधिकृत नवराज वरालले यस्तो प्राज्ञिक संस्था पोखरा १ मा जन्मदा अति नै खुशी अनुभूति भएको हुँदा गौरव गर्दै सँधै आवश्यक सहयोग गर्ने बताए ।

कार्यक्रममा सोसाईटीका सह–कोषाध्यक्ष क्या. सन्त बहादुर लामिछाने नेपालकै पहिलो हट एअर बेलुनका प्रविधिक बन्न सफल भएको र संस्थाका सल्लाहकार एवम् विधान मस्यौदा समितिका संयोजक अधिवक्ता माधवराज बास्तोला हालै वरिष्ठ अधिवक्ता भएकोमा सोसाइटीले सम्मान गरेको थियो । पोलिटिकल साईन्स सोसाइटी नेपालले ५ बुुँुदे घोषणा पत्र पनि जारी गरेको छ ।

गोष्ठीमा सहभागीलाई धन्यवाद ज्ञापन सहसचिव डा. संजय कोईराला र संचालन सचिव मिलन आलेले गरेका थिए ।