काठमाडौं । सप्तकोसी नदीको बाढी उदयपुरको बेलका नगरपालिकाका बस्तीमा पसेको छ।

आज बिहान ४ बजेदेखि बेलका नगरपालिकामा ८ को जिरो पोइन्टबाट सप्तकोशीको बाढी बस्तीमा पसेको हो।

मंगलबार दिउँसैदेखि बाढी रोक्ने प्रयास गरिए पनि आज बुधबार बिहान सप्तकोशीले अस्थायी बाँध भत्काएको बेलका नगरपालिकाले जनाएको छ। योसँगै नगरपालिका वडा नम्बर २ र ३ का सयौं बस्ती जोखिममा परेका छन्। कोशीले केही घर डुबाएको छ।

कटान रोक्न सरकारी तहबाट भएको प्रयास प्रभावकारी नहुँदा बाढी अस्थायी बाँध फुटाएर बस्तीमा पसेको हो।

नगरपालिकाले प्रभावित क्षेत्रका बासिन्दालाई सुरक्षित स्थानमा सार्न थालेको छ। डुम्रीबोटे हुँदै छिर्ने बाढीले सिसौलीघाट, धौरी टप्पु, चिलिमे, एबीसी, श्रीलंका टापु र रामनगरका स्थानीय प्रभावित भएका छन्। २०४५ सालदेखि कोशी पूर्वतिरबाट बग्न थालेपछि यो क्षेत्रमा बस्ती बसेको थियो। ३४ वर्षपछि कोशीले आफ्नो पुरानै बाटो समात्दा सयौं परिवार विस्थापित हुने देखिएको छ।

कोशीको मूल भँगालो बस्तीतिर जान थालेपछि उदयपुरसँगै सुनसरी र सप्तरीका केही बस्तीसमेत डुबानमा पर्नेछन्।