लोकगायक कल्याण शेरचनको ७६ औं जन्मजयन्तीकाे अवसरमा पोखरामा बिहीबारबाट राष्ट्रिय खुल्ला दोहोरीगीत प्रतियोगिता आयोजना हुँदैछ ।

कल्याण शेरचन स्मृति प्रतिष्ठानको आयोजनामा बिहीबारदेखि शनिबारसम्म पोखरा सभागृहमा राष्ट्रिय खुल्ला दोहोरीगीत प्रतियोगिता, स्रष्टा सम्मान एवं इन्द्रेणी कार्यक्रम हुन लागेको हो । बुधबार पोखरामा आयोजित पत्रकार सम्मेलनमा बोल्दै प्रतिष्ठानका अध्यक्ष पूर्णबहादुर गुरुङ ह्योल्मोले प्रतियोगिताको सम्पूर्ण तयारी पूरा भएको जानकारी दिए ।

प्रतियोगिताका लागि देशभरबाट ४६ टिमले नाम दर्ता गराएका छन् । प्रतियोगितामा प्रथम हुने समूहलाई ६ लाख, द्धितीय हुने समूहलाई ४ लाख, तृतीय हुनेलाई २ लाख र सान्त्वना हुने समूहलाई १ लाख पुरस्कार प्रदान गरिने छ । त्यस्तै उत्कृष्ट गायक, गायिका र अनुशासित समूहलाई ५०-५० हजार पुरस्कार प्रदान गरिने प्रतिष्ठानका सचिव एवं कार्यक्रम संयोजक जीवन दाहालले जानकारी दिए ।

कार्यक्रममा कम्पनी र श्रष्टाहरुबाट अनुमति पाएका भाखाहरुलाई मात्र प्रस्तुत गरिने र रोयल्टी समेत प्रदान गरिने राष्ट्रिय लोक तथा दोहोरी गीत प्रतिष्ठान नेपालका अध्यक्ष रमेश बिजीले बताए । इन्दे्रणी कार्यक्रमका प्रस्तोता कृष्ण कँडेलले कल्याण शेरचनले नेपाली गीत संगीतको क्षेत्रमा पु¥याएको योगदान स्वरुप आफूहरुले प्रतिष्ठानसंग सहकार्य गरेको बताए ।

सो अवसरमा वरिष्ठ लोकगायक नारायण रायमाझी र शिक्षासेवी एवं खेलकुदकर्मी योगेन्द्रबहादुर बस्नेत (मरणोपरान्त) लाई नगद रु. २५-२५ हजार सहित सम्मान पत्रले सम्मान गरिने प्रतिष्ठानले जनाएको छ । प्रतियोगिताको पोखरा महानगरपालिकाका मेयर धनराज आचार्यले उद्घाटन गर्ने कार्यक्रम छ ।

प्रतियोगिताबाट ५५ लाख आम्दानी हुने र ३९ लाख पचास हजार खर्च हुने आयोजकले जनाएको छ । बचत १५ लाख ५० हजार रकम शेरचनको सालिक निर्माण तथा लोकबाजा संरक्षणका लागि संग्राहलय स्थापना गरिने प्रतिष्ठानका अध्यक्ष गुरुङले बताए ।

शेरचनका सोह्र बर्षे उमेरमा मै पनि झिल्के हुँदो हुँ, आहा कलिलो तामालाई सोध रामलाई‍ लगायतका गीत चर्चित छन् । वि.सं. २००३ साल साउन १२ गते पोखराको रानीपौवामा जन्मिएका शेरचनको २०६७ साल माघ २४ गते निधन भएको थियो ।

कार्यक्रममा गण्डकी प्रज्ञा प्रतिष्ठान, पोखरा प्रज्ञा प्रतिष्ठान, राष्ट्रिय लोक तथा दोहोरीगीत प्रतिष्ठान नेपाल, इन्द्रेणी सांस्कृतिक समाज काठमाडौं र हिमाली सांस्कृतिक परिवार पोखराले सहकार्य गरेका छन् । कार्यक्रमको प्रवर्द्धकमा पोखरा महानगरपालिका रहेको छ ।

सहभागी ४६ टाेली यी हुन्