काठमाडौं। बैङ्किङ कसुर मुद्धामा फरार रहेकी पोखराकी एक महिलालाई प्रहरीले पक्राउ गरेको छ। पोखरा महानगरपालिका -१७ घर भइ हाल काठमाण्डौ -१३ बाफल बस्दै आएकी ४२ वर्षीया निशा गुरुङलाई प्रहरीले पक्राउ गरेको हो।

प्रहरीका अनुसार उच्च अदालत पाटनको २०७९ बैशाख १३ गतेको फैसलाले ५ दिन कैद सहित २३ लाख १४ हजार २ सय ५० रुपैयाँ जरिवाना ठहर गरेकोमा उनी फरार रहँदै आएकी थिइन्। फरार रहेकी उनलाई केन्द्रीय अनुसन्धान व्यूरो महाराजगंजबाट खटिएको प्रहरीले टोखा नगरपालिका-६ टोखाबाट पक्राउ गरेको हो ।

गुरुङले कुमारी बैंक लिमिटेड दरबारमार्ग शाखा कार्यालय काठमाडौंमा रहेको आफ्नो खातामा पर्याप्त मौज्दात रकम नभएको भन्ने जानी-जानी पीडितलाई रकम भुक्तान हुने भनी दिएको चेकको रकम भुक्तानी हुन नसकेपछि परेको मुद्धामा अदालतले उक्त फैसला गरेको थियो ।

हाल उनलाई फैसला कार्यान्वयनको लागि जिल्ला अदालत काठमाडौंमा पेश गरिएको प्रहरीले जनाएको छ ।