पोखरा।  आज साउन महिनाको पहिलो सोमबार पोखराको केदारेश्वर मन्दिरमा दर्शनार्थीको घुइँचो लागेको छ। बिहानैदेखि पोखराका विभिन्न क्षेत्रबाट पूजा गर्न मन्दिर परिसरमा वृद्ध वृद्धादेखि महिला दिदीबहिनीको घुइँचो लागेको हो।

केदारेश्वर मन्दिर व्यवस्थापन समितिले दर्शनार्थीको सहजताका लागि लाइनको व्यवस्था गरेको थियो।  मन्दिर व्यवस्थापन समितिका पुजारी समेत रहेका मेदनी प्रसाद गुरागाईँले यस पटकको साउनमा ५ ओटा सोमबार परेकाले महत्त्वपूर्ण रहेको बताए। उनले  प्रत्येक दिन नसके पनि साउन महिनाको सोमबार भगवान् भोलेनाथलाई जल चढाउने तथा प्रसन्न गर्ने, भोलेनाथको उपासना गर्नाले मनले चिताएको पुरा हुने विश्वास गरे।

बोलबमधामको रूपमा परिचित केदारेश्वर मन्दिरमा बोल बमले साउन महिनामा पोखरा र यस क्षेत्रको वातावरण बोल बम ध्वनि, भजन कीर्तन र गेरु वस्त्रले गुलजार हुने गरेको छ ।

भगवान् शिवको महिना साउनमा भक्तजनले शिवको आराधना गर्नुका साथै साउन महिनामा व्रत बसेर हरियो रङ्गको चुरा, कपडा र मेहेन्दी लगाए शिव खुसी हुने र मनोकाङ्क्षा पुरा हुने विश्वास गरिन्छ ।