पोखराकाे पर्यटकीय क्षेत्र लेकसाइडमा शनिबार राती मदिराले मातेर कार हाँक्दा ६ सवारी साधनलाई ठक्कर दिएको छ । कारले ठक्कर दिंदा एक ट्याक्सी र पाँच वटा मोटरसाइकल, स्कुटरमा क्षति पुगेको छ ।

राति २ः३० बजे हल्लनचाेकबाट बाराहीचोकतर्फ जाँदै गरेको बा १२च ६३३९ नम्बरको कारले रोकिराखेको एक ट्याकी, दुई मोटरसाइकल र ३ वटा स्कुटरलाई ठक्कर दिएको थियो ।

कारले पार्किङ रहेको ग१ज ३८४३ नम्बरको ट्याक्सी, ग२१प ७३८० स्कुटर, ग२०प ७१६१ नम्बरको स्कुटर, ग९प ७३८० नम्बरका मोटरसाइकल, ग९प ५०६ नम्बरको स्कुटर, ग११प ६७२ नम्बरको मोटरसाइकललाई ठक्कर दिएको थियो । ठक्करबाट मोटरसाइकल र स्कुटरमा क्षति भएको छ । दुर्घटनापछि भागेको कारलाई प्रहरीले नियन्त्रणमा लिएको थियो ।

प्रहरीले कार चालक झापाको कन्काई नगरपालिका वडा नं. ६ का २० वर्षीय विनायक ओलीलाई पक्राउ गरेको छ । उनी पाेखरा घुम्न आएको बुझिन्छ । रातको समय भएकाले दुर्घटनामा मानवीय क्षति भने नभएको ट्राफिक प्रहरी कार्यालय कास्कीले जनाएको छ ।