पोखरामा तालिमरत एक प्रहरी जवानको मृत्यु भएको छ । मुत्यु हुनेमा बाग्लुङको जैमिनी नगरपालिका ९ की पवित्रा थापा रहेकी छिन् ।

गत सालको असोज १७ गतेबाट गण्डकी प्रदेश प्रहरी गण पोखरामा सञ्चालन भएको २३४ कार्यावधिको प्रहरी जवान आधारभुत तालिम ७–०३ औं समूहमा तालिममा रहेकी थापाको उपचारका क्रममा मृत्यु भएको हो ।

नियमित शारीरिक अभ्यासको क्रममा स्वास्थ्यमा समस्या आएपछि उनलाई अस्पताल भर्ना गरिएको थियो । पोखरा स्वास्थ्य विज्ञान प्रतिष्ठान पोखराले असार ३० गते मृत घोषणा गरेको हो ।

थापाको बिहीबार अन्तिम श्रद्धाञ्जली अर्पण गरेको गण्डकी प्रदेश प्रहरी कार्यालयले जनाएको छ । उनलाई गण्डकी प्रदेश प्रहरी तालिम केन्द्रका समादेशक दिल्लीराज पन्तले नेपाल प्रहरी संगठनको झन्डा ओढाएर अन्तिम श्रद्धाञ्जली व्यक्त गरेका थिए । थापाको अन्तिम संस्कार स्थलमा प्रहरीको एक टुकडीले शोक सलामी समेत अर्पण गरेको थियो ।