काठमाण्डौ।  संसद्को कानुन, न्याय तथा मानव अधिकार समितिले बलात्कार मुद्दामा हदम्याद बढाउने निर्णय गरेको छ । शुक्रबार विधेयक पारित गर्दै समितिले बलात्कार मुद्दामा हदम्याद बढाएको हो । समिति सभापति कृष्णभक्त पोखरलेका अनुसार बालिगको हकमा बलात्कार मुद्दामा एक बर्ष र नावालिगको हकमा दुई बर्ष हदम्याद बढाइएको छ ।

समितिले जुटाएको सहमितअनुसार अब कुनै पनि बलात्कारमा परेका नावालिगकले वालिग भएको (१८ वर्ष पूरा भएको) तीन वर्षपछि अर्थात् २१ वर्षको उमेर हुँदासम्म उजुरी गर्नु पाउनेछन् । वालिगको हकमा घटना भएको दुई वर्षभित्र उजुरी गर्नुपर्नेछ भने,अपाङ्गता, जेष्ठ नागरिक र सुस्त मनस्थितिको हकमा तीन महिने हदम्याद बढाएर ३ वर्ष पुर्‍याएको छ ।

समितिमा केही दिनदेखि यौन हिंसाविरुद्धका केही ऐन संशोधन गर्न बनेको विधेयकमाथिको छलफल चलिरहेको थियो । छलफलमा सहभागी केही सांसदले हदम्याद हटाउनुपर्ने माग राखेका थिए ।

महिला अधिकारकर्मीहरूले पनि हदम्याद हटाउनु माग गर्दै आएका थिए ।