गण्डकी प्रदेशका अर्थमन्त्री रामजीप्रसाद बराल (जीवन)ले मन्त्रीपरिषद्को निर्णय विपरित बजेट पेश गरेपछि विवादित बनेका छन् । सांसदहरुले मात्रै होइन, मन्त्रीहरुले पनि खुलेआम राजीनामा माग गर्न थालेका छन् ।

आगामी आर्थिक वर्षको बजेटबाट मुख्यमन्त्रीलाई समेत जानकारी नै नदिई निर्वाचन क्षेत्र पूर्वाधार विकास कार्यक्रम हटाएको विषय पेचिलो बनेको छ । आइतबारदेखि हुने भनिएको बजेटमाथिको छलफल नै रोकिएको अवस्था छ ।

अर्थमन्त्रीले एकलौटी गरेको भन्दै अरु मन्त्री नै खुलेआम विरोधमा उत्रिएका हुन् । अर्थमन्त्रीले राजीनामा दिनुपर्ने वा बजेटको कार्यक्रम फेर्नुपर्ने माग भइरहेका छन् । गठबन्धनमा सहभागी युवा तथा खेलकुद मन्त्री राजीव गुरुङ (दीपक मनाङे) खह्रो विरोधमा उत्रिरहेका छन् । ऊर्जामन्त्री हरिशरण आचार्य पनि अर्थमन्त्रीसँग रुष्ट रहँदै आएका छन् ।

 खेलकुदमन्त्री गुरुङ अर्थमन्त्रीले वा मुख्यमन्त्री स्वयम्ले पद छोड्नुपर्ने बताउँछन् । ‘कि अर्थमन्त्री कि उहाँ (मुख्यमन्त्री)ले छोड्नुपर्छ । अर्थमन्त्रीको राजीनामा कुर्ने होइन । मुख्यमन्त्रीले स्याक गर्ने हो । जुन काम गरेको छ अर्थमन्त्रीले त्यो ठूलो आपराधिक गतिविधि हो,’ उनले भने । अर्थमन्त्रीले मुख्यमन्त्री, मन्त्रीलाई नै बेबकुफ बनाएको उनको टिप्पणी छ ।

बजेट विवाद र अर्थमन्त्रीबारे: मन्त्री मनाङे

‘बजेटमा के–के नै गर्ला भनेर बोल्यो । केही भयो रु भोलिपल्टदेखि संसद अनिश्चितकालीन बन्द भयो । एमालेले बन्द गर्नुपर्ने, कांग्रेसले बन्द गरेको छ । हामी आफैँले बनाएको अर्थमन्त्रीले हामीलाई नै बेबकुफ बनाइदियो । मुख्यमन्त्रीले आफ्नो टाउकोमा लिनुपर्छ ।

कि अर्थमन्त्री कि उहाँ (मुख्यमन्त्री)ले छोड्नुपर्छ । अर्थमन्त्रीको राजीनामा कुर्ने होइन । मुख्यमन्त्रीले स्याँक गर्ने हो । जुन काम गरेको छ अर्थमन्त्रीले त्यो ठूलो आपराधिक गतिविधि हो । धन्न म मन्त्रिपरिषद्मा गएको थिइनँ, बेबकुफ बनाएन । अर्थमन्त्री फेर्न किन यत्रो सोच्नप¥यो रु माओवादीमा अरु मान्छे छैन रु दीपक कोइराला भन्ने मान्छे स्मार्ट छ त ।

अर्थसचिव फेर्न मिल्छ । मन्त्रीको काम राजीनामा दिएर जाने हो । मुख्यमन्त्रीले स्याक गर्न सकेन भने आफैँ छोड्दिने हो । ६ महिनापछि फेरि सरकारमा जाने हो भनेर माफ गर्ने हो भने सरकार बनाएर के हुन्छ ? यही मान्छेजस्तो आउने हो । चीनको माओत्से तुङको छोरा आउने होइन । यस्तै बेबकुफ (अर्थमन्त्री बराल इंगित) पठाउने हो ।

ढाँटेको पनि मुद्दा लाग्ने हो भने अर्थमन्त्रीलाई लाग्छ । गफ दिएको, ढाँटेकोलाई भ्याट लाग्ने हो भने यो अर्थमन्त्री कङ्गाल हुन्छ । तर, भ्याट र कर केही लाग्दैन । अर्थमन्त्री एकदम हावा रहेछ । यस्तो मान्छेलाई अर्थमन्त्री बनाएर बजेट कार्यान्वयन गर्ने हो रु मैले पहिल्यै भनेको अर्थमन्त्री जो पायो त्यहीलाई बनाउनु हुँदैन ।

एमालेसँग झुन्डिएर जितेको त हो । सिंगल लड्न जाओस् वडामा हार्छ यिनीहरु । देव गुरुङले मनाङमा आफ्नो वडाबाहेक अरु जुनसुकै वडा जितेर देखाओस् सन्यास लिन्छु ।

माओवादीले अर्को मान्छे पठाएन भने बुझ्नुस् अर्थमन्त्रीले यो काम आफ्नो पार्टीको कमान्डरलाई नै सोधेर गरेको हो । नत्र यो मान्छे हैसियत भएको मान्छे होइन । एमालेकै कारणले सांसद भएको हो । नत्र वडामा पनि ठाउँ हुने मान्छे होइन । यो स्तरको मान्छेले देशको ढुकुटी नै बिगार्ने भनेको मजाक होइन ।’

मुख्यमन्त्रीको इच्छा थिएन, समेट्न बाध्य भइनँ: अर्थमन्त्री बराल

अर्थमन्त्री बरालले मुख्यमन्त्रीको इच्छा नै नदेखिएकाले यो कार्यक्रमलाई निरन्तरता नदिइएको प्रष्ट्याएका छन् । तर, आफूले राख्न भनेको कार्यक्रम काटेकोमा मुख्यमन्त्री रुष्ट बनेका छन् । संसदमा सांसदबाट पोखिन सक्ने असन्तुष्टिकै कारण बजेटमाथिको छलफल नै सरकारले रोकेको छ ।

१ असारमा बजेट संसदमा प्रस्तुत गर्नुअघि मन्त्रिपरिषद् बैठक बसेको थियो । त्यहाँ मुख्यमन्त्री कृष्णचन्द्र नेपाली पोखरेलले मन्त्री बराललाई उक्त कार्यक्रमलाई निरन्तरता दिन भनेका थिए । जवाफमा मन्त्री बरालले कार्यक्रम यथावत रहेको सुनाए । तर, त्यही दिन संसदमा प्रस्तुत बजेटमा भने निर्वाचन क्षेत्र पूर्वाधार कार्यक्रम नै काटियो । नीति कार्यक्रममै नरहेकाले बजेटमा उक्त कार्यक्रम नसमेटेको अर्थमन्त्री बरालको भनाइ छ ।

निर्वाचन क्षेत्र पूर्वाधार विकास कार्यक्रमअन्तर्गत प्रदेशका ३६ निर्वाचन क्षेत्रमा ७२ करोड रुपैयाँ सांसदले चलाउन पाउँथे । गठबन्धनभित्रको सहमतिविपरीत हटाएको विषयमा आइतबार अर्थमन्त्री बरालको पार्टी माओवादी केन्द्र र प्रदेश सरकारको नेतृत्व गरेको कांग्रेसको संसदीय दलको बैठक बसेको थियो ।

दुवै दलले जसरी पनि निर्वाचन क्षेत्र पूर्वाधार विकास कार्यक्रमलाई समेट्नुपर्ने निचोड निकालेका छन् । अर्थमन्त्री बराल अब कुनै पनि हालतमा त्यो सम्भव नभएको बताउँछन् । उनी भन्छन्, ‘३५ अर्ब ९० करोड ९० लाख रुपैयाँको बजेट आएको छ । अब एक रुपैयाँ घटबढ हुँदैन । निर्वाचन पूर्वाधार कार्यक्रम आउँदैन ।’