पोखराका नवनिर्वाचित मेयर धनराज आचार्य, उपमेयर मञ्जुदेवी गुरुङलगायत यहाँका जनप्रतिनिधिले फूल रोपेर पद सम्हालेका छन् । पोखरा सभागृहमा मुख्य निर्वाचन अधिकृत श्रीकृष्ण भट्टराईसँग सपथ ग्रहण गरेपछि पोखराका नवनिर्वाचित जनप्रतिनिधिको टोलीले पोखरा जिरो किमिदेखि हल्लनचोकसम्म फूल राेपेका हुन् ।

पोखरा पर्यटकीय सहर भएकाले फुलैफूलको सहरका रुपमा चिनाउन ‘सिम्बोलिक’ रुपमा फूल रोपिएको नवनिर्वाचित मेयर आचार्यले बताए । फूल राेप्नुअघि पुष्पलाल पार्क पुगेर नेपाली कम्युनिष्ट संस्थापक नेता पुष्पलाल श्रेष्ठकाे शालिकमा नवनिर्वाचित मेयर आचार्य र उपमेयर  गुरुङले माल्यार्पण गरे ।

त्यहाँबाट निस्किएर जनप्रतिनिधिले जिरोदेखि हल्लनचोकसम्मको डिभाइडरमा फूल रोपेका हुन् । डिभाइडरमा १ सय ६७ (जनप्रतिनिधि संख्या) वटा फूल रोपिएको छ । ‘पोखरा विश्वकै सुन्दर सहर हो । फूल भनेको सुन्दरताको प्रतीक हो । म पोखरालाई पोखरालाई फुलैफूलको सहर बनाउँछु,’ डिभाइडरमा फूल रोपेपछि मेयर आचार्यले भने, ‘पोखरालाई ग्रिनरी सहर बनाउने हाम्रो लक्ष्य छ ।’