पोखरा । गठबन्धनबाट पोखरा महानगरपालिकाको उम्मेदवार बनेका धनराज आचार्यले सबै मिलेर नै पोखरा बनाउनुपर्ने बताएका छन् । पोखरा महानगरपालिका ७ र १७ को घरदैलोमा उनले एक व्यक्ति वा एक राजनीतिक दलले मात्र पोखरा बनाउन नसक्ने र पोखरा बनाउनका लागि सबैको साथ र समर्थनको आवश्यकता हुने जनाएका हुन् ।

उनले गठबन्धनको घोषणा पत्रमा उल्लेख गरेका सबै विषयलाई ५ वर्षमा पूरा गर्ने लक्ष्यका साथ चुनावी मैदालनमा होमिएको सुनाए । ‘आजसम्म जुन ढंगले अभिभावकत्व प्रदान गर्नुपथ्यो, विगतको सरकारले गरेन । गणतन्त्रपछि बनेको स्थानीय सरकार विगतमा धेरै ठाउँमा चुकेको छ’, उनले भने ।

उनले महानगर र वडाको कामलाई विभाजन गरिने र वडाबाटै हुने कामलाई महानगरमा जान नपर्ने गरी व्यवस्था मिलाइने उल्लेख गरे । उलने राइट पिपुल राइट प्लेसको अवधारणालाई अगाडि सारिने उल्लेख गरे । महानगरमा भएका कर्मचारी कसैलाई फूल ड्युटी नभई ड्युटीफूल बनाइने उनको योजना छ ।

उम्मेदवार आचार्यले पोखरा महानगरपालिकाको अहिलेको जनसंख्या झण्डै ६ लाख भएको भएको औंल्याउँदै १० वर्षअघिको जनसंख्याका लागि बनेका संरचना अहिले अनुपयुक्त भएको तर्क गरे । उनले भने, ‘यो बेला जनसंख्या २ लाख ५२ हजार थियो । त्यति बेलाका लागि बनेको पूर्वाधार अहिलेको जनसंख्यालाई थेग्ने खालका छैन । अबको १० वर्ष पछिको जनसंख्या कति हुन सक्छ होला । त्यसलाई आंकलन गर्दै विकासका परियोजनालाई अगाडि बढाइनेछ ।’

५० वर्ष छिको पोखरालाई ध्यान दिएर ग्रेटर पोखरा बनाउने लक्ष्यका साथ गठबन्धन चुनावमा होमिएको उनको भनाइ छ । समृद्ध सहरको परिकल्पना गरिरहँदा मोटरबाटो र पुल निर्माण लाई मात्र हेर्नन हुने तर्क उनको छ । सभ्य नागरिक बस्न सक्ने पोखरा बनाउने दायित्व सबैको भएको उनी बताउँछन् । ‘हिजो हाम्रा पुर्खाले बनाएका चौतारा आज हराएका छन्, पार्क छैनन् । उपत्यका नगर विकास समितिका जग्गामा अव्यवस्थित बसोबास भइरहेको छ । देखिएका सबै समस्यालाई चिरफार गर्ने गरी हामी लागिपरेका छौं’, उनले भने ।

५ राजनीतिक दलको साथ र आम पोखराबासीको समर्थनले चुनाव जित्नेमा आफू विश्वस्त रहेको उनले उल्लेख गरे । आचार्यले विकासका लागि स्रोत र साधनको अभाव नहुने उल्लेख गरे । पोखरा १७ मा भएको कोणसभामा उनले फेवाताल, पाताले छाँगो, गुप्तेश्वर गुफा, सेती नदी लगायतका सम्पदाको पारदर्शी ढंगले उपयोग गरिने सुनाए ।

सरोकारवालाको भावनालाई सम्बोधन गरी विना विवाद काम गर्न सकिने उनको भनाइ छ । ‘पोखरामा रहेका सम्पदाको उचित संरक्षण र पारदर्शी उपयोगबाट नै धेरै काम गर्न सक्छौं । कयौं काम अध्यारो कोठामा बसेर गरिँदा समस्या आएका छन् । हामी त्यसो हुन दिँदैनौं,’ उनले भने ।

आफूहरु केही गर्न र पोखरालाई महानगरको रुपमा विकास गर्न आएको उनको भनाइ छ । सहरी क्षेत्रको फोहोरसहितको ढल बगेर बिरौटा र छोरेपाटनमा थुप्रिने गरेको उल्लेख गर्दै उनले त्यसको उचित व्यवस्थापन गरिने बताए ।

उपमेयरकी उम्मेदवार कोपिला रानाभाटले आफूहरु जनताको सेवामा केन्द्रीत हुने बताइन् । रानाभाटले गठबन्धन आजको आवश्यकता भएको र जित सुनिश्चित भएको उल्लेख गरिन् ।

नेकपा एकीकृत समाजवादीका पोलिट्ब्युरो सदस्य श्रीनाथ बरालले गठबन्धनका उम्मेदवारलाई नगरवासीले मत दिए सुन्दर र समृद्ध पोखरा आफूहरुले दिने धारणा राखे ।

गठबन्धनले आमा समूहलाई १ समूह, १ उत्पादन कार्यक्रममा समेट्ने योजना बनाएको छ । यस्ता समूहलाई कुनै उद्योग खोल्न महानगरले २० प्रतिशत अनुदान दिने नीति लिइने गठबन्धनको घोषणापत्रमा उल्लेख गरे । गठबन्धनले जित हासिल गरे बाँकी ८० प्रतिशत लगानीका लागि महानगर बैंक ग्यारेन्टी ऋणको व्यवस्था गरिने जनाइएको छ ।

गठबन्धनले अति विपन्न परिवारको निशुल्क स्वास्थ्य बिमा गर्ने, आकस्मिक रेस्पोन्स तथा ट्रमा सेन्टरको सुविधासहित महानगरीय स्वास्थ्य सेवा अन्तर्गत मेट्रो अस्पताल सञ्चालन गर्ने, ३ महिनाभित्र पोखरा महानगरपालिकामा घुम्ती अस्पताल र ‘सुन्दर पोखरा स्वस्थ पोखरेली’ कार्यक्रम, सुत्केरी आमा र बच्चाको स्वास्थ्य प्रवद्र्धनका लागि ६ महिनासम्म २ हजारका दरले सुत्केरी पोषण जस्ता योजनाअघि सारेको छ ।