वालिङ। स्याङ्गजाको वालिङ् नगरपालिका वडा नं -१३ को अध्यक्ष पदका लागि मंगोल नेशनल अर्गनाइजेसन (एमएनओ) का आश बहादुर गुरुङले उम्मेद्वारी दिएका छन्।
समान अधिकार, मूल बासीको अस्तित्व रक्षा, पहिचान र मूलवासीहरुको आर्थिक, सामाजिक र शैक्षिक हक अधिकारका लागि भन्दै गुरुङले वडा अध्यक्ष पदका लागि उम्मेद्वारी दिएका हुन्।

वालिङ नगरपालिका -१२ सिर्सेकोटमा जन्मिएका गुरुङ हाल वालिङ -१३ बायाटारीमा व्यवसाय गर्दै आइरहेका छन्। भूपू भारतीय सैनिक समेत रहेका गुरुङले आफू निर्वाचित भएको खण्डमा मूलवासीको हकहित र अधिकारका लागि आवाज उठाउने र छुवाछुतमुक्त समाज बनाउनका लागि भूमिका खेल्ने बताए।

उनले वडाको दिगो विकासका साथै वडालाई स्वच्छ सफा र भष्ट्राचार मुक्त बनाउँदै नमुना वडाको रुपमा परिचित बनाउन पहल गर्ने दाबी गरे।
उनले आफ्नो वडाको हरेक टोल-टोलमा सडकको निर्माण र स्वच्छ खानेपानीका लागि काम गर्ने बताए।

आफ्नो अस्तित्वको रक्षा गर्दै एकजुट भएर वर्णभेदी नीतिको खुलेर विरोध गर्दै समग्र वडाको विकास र समृद्धिका लागि काम गर्न आफूले उम्मेद्वारी दिएको गुरुङले स्पष्ट पारे।