पोखरा। निर्वाचन आयोगको कार्यालय पोखरामा महानगरको मेयर पदका लागि आइतबारसम्म १० जनाले उम्मेदवारी दर्ता गराएका छन् । उम्मेद्वारी दिएकामध्ये ४ जना पार्टीका उम्मेदवार छन् भने, ६ जनाले स्वतन्त्रबाट उम्मेद्वारी दिएका छन्।

उम्मेद्वारी दिने पार्टीका उम्मेदवारहरुमा सञ्जय तिमिल्सिना मौलिक जरोकिलो पार्टी, भोजराज खनाल सचेत नेपाली पार्टी, मुक्तिनाथ सुवेदी नेपाली जनता दल र प्रेम प्रसाद गुरुङ मंगोल नेसनल अर्गनाइजेसनका छन्।
यस्तै, लेखक गणेश पौडेल, विमलबहादुर कार्की, रामराज अधिकारी, डिलबहादुर गुरुङ, नवराज बास्तोला र किसानसिंह गुरुङले स्वतन्त्र उम्मेदवारी दिएका हुन् ।

निर्वाचन आयोगले आगामी वैशाख ३० गते हुने स्थानीय निर्वाचनका लागि आइतबार र सोमबार उम्मेदवारको मनोनयन दर्ताको तालिका सार्वजनिक गरेको थियो ।

कार्यालयका अनुसार आइतबारसम्म मेयर, उपमेयर, वडाध्यक्ष र वडा सदस्यहरु गरी ४७ जनाको उम्मेदवारी परेको छ । आयोगले मेयर र उपमेयरमा उम्मेदवारी दिन १ हजार ५ सय रुपैयाँ, वडाध्यक्षका लागि १ हजार र सदस्यका लागि ५ सय रुपैयाँ दर्ता शुल्क तोकेको छ ।