मोरङ । मोरङमा जग्गा अंशवण्डाको विवादलाई लिएर छोराले वृद्ध बाबुको हत्या गरेका छन् ।

बेलबारी नगरपालिका–७ काफ्ले टोलका ३१ वर्षीय बासुदेव कार्कीले बिहीबार दिउँसो १२ः३० बजेतिर बुवा ६२ वर्षीय जयबहादुर कार्कीको हत्या गरेको प्रहरीले जनाएको छ ।

प्रहरीका अनुसार अंशको विषयलाई लिएर बासुदेव र उनका भाइ २८ वर्षीय तीर्थराज कार्कीबीच झगडा भएको प्रारम्भिक अनुसन्धानबाट खुलेको छ ।

दाजु–भाइको झगडा छुट्याउन गएका बेला बासुदेवले बुवालाई कुटपिट गरी ढुंगा बिछ्याएको आँगनमा पछारिदिएका थिए ।

छोराले आँगनमा पछारेपछि गम्भीर घाइते भएका जयबहादुरको उपचारका क्रममा विराटनगरको विराट नर्सिङ होम एवं विराटनगर अस्पतालमा दिउँसो ३ः३० बजेतिर मृत्यु भएको प्रहरीले जनाएको छ ।

बासुदेवले आमा ५८ वर्षीया उमादेवी कार्कीमाथि समेत कुटपिट गरेको प्रहरीले जनाएको छ । कुटपिटबाट उमादेवीको अनुहार र टाउकोमा चोट लागेको छ ।

प्रहरीले बाबुको हत्यामा संलग्न अभियोगमा बासुदेवलाई पक्राउ गरेको छ । उनका भाइ तीर्थराजलाई पनि नियन्त्रणमा लिएर घटनाको अनुसन्धान सुरु गरेको प्रहरीले जनाएको छ ।