काठमाण्डौ।  अर्थमन्त्री जनार्दन शर्माले सरकार र सरकारी निकायमा प्रयोग हुने इन्धनको खर्च कटौती गर्ने प्रस्ताव मन्त्रिपरिषद्मा पुगेको जनाएका छन् । अर्थमन्त्रालयमा आयोजित पत्रकार सम्मेलनमा अर्थमन्त्री शर्माले सार्वजनिक बिदाका दिन सरकारी सवारी साधन प्रयोग नगर्ने गरी प्रस्ताव तयार भएको उल्लेख गरे ।

उनले भने, ‘अहिले विदेशी मुद्राको सबैभन्दा ठूलो खपत इन्धन आयातमा भइरहेको छ । यसलाई न्युनिरकण गर्न मुख्य सचिवको संयोजकत्वमा एक समिति बनाई विदेशी मुद्रा सञ्चितीका लागि के के काम गर्न सकिन्छ भनेर सुझावका लागि खटाईएको छ । यसबारे छलफल भइरहेको छ ।’

उद्योगधन्दा ठिक ढङ्गले सञ्चालनमा रहेको, विप्रेषण आप्रवाह पनि सकारात्मक रूपमा वृद्धि भएको अर्थमन्त्री शर्माले तथ्याङ्क पेश गरे । उनका अनुसार गत फागुन मसान्तसम्म मात्रै ९१ अर्ब बराबरको विप्रेषण आयात भएको छ ।

अर्थमन्त्रीले विप्रेषण आप्रवाह नियमित रूपमा बृद्धि हुने क्रममा रहेको तथा राजश्व पनि लक्षित सीमाभन्दा बढी उठीरहेको तथ्य पेश गर्दै अनावश्यक प्रचार र हल्लाको पछाडि नलाग्न सबैलाई आग्रह गरे ।