उदयपुर । उदयपुरमा ट्युशन पढ्न निस्किएकी एक बालिका मृत फेला परेकी छन् ।

आज मङ्गलबार बिहान ४ बजतिर बेलका नगरपालिका ३ बुद्धचौक स्थित घरबाट ट्युशन पढ्न निस्किएकी १५ वर्षीया बालिका कविता सुनवार मृत भेटिएकी प्रहरीले जनाएको छ ।

आज बिहान कतिब ७ बजे बालिकाको शव स्थानीयवासीले जशोधा खोलाको किनारमा देखेपछि इलाका प्रहरी कार्यालय रामपुरलाई जानकारी गराएका थिए । शवको प्रकृति हेर्दा हत्या भएको देखिए पनि प्रहरीले यसको पुष्टि गरिसकेको छैन ।

प्रहरी अनुसन्धानका क्रममा कर्तव्य गरी हत्या भएको जस्तो देखिए पनि अहिले नै यकिन गर्न नसकिने बताइएको छ । थप अनुसन्धानका लागि केन्द्र र प्रदेश प्रहरीसँग समन्वय भइसकेकाले अनुसन्धानपछि मात्र घटना कसरी घट्यो भनेर यकिन हुने प्रहरीले जनाएको छ ।

कोशी जनता माध्यमिक विद्यालयमा कक्षा १० मा अध्ययनरत बालिका माध्यमिक शिक्षा परीक्षा (एसईई) को परीक्षाको तयारीका लागि ट्युशन पढ्न बिहानै जाने गरेको स्थानीयवासीले जनाएका छन् । घटना विद्यालयदेखि झन्डै सात सय मिटर र घरबाट झन्डै दुई किलोमिटर पर घटेको हो ।

प्रहरीले घटनास्थल क्षेत्रलाई घेरामा राखिएको छ ।