काठमाडौँ । अमेरिकी राष्ट्रपति जो वाइडेनले युक्रेनको बुचा सहरमा रुसी सैनिकले नरसंहार गरेको भन्दै रुसी राष्ट्रपति भ्लादिमिर पुटिन विरुद्ध युद्ध अपराधिको रुपमा मुद्धा चलाउन आह्वान गरेका छन् ।

तीन सय जना भन्दा धेरै निशस्त्र नागरिकलाई यातना दिएर हत्या गरेको भन्दै वाइडेनले यो क्रुरता र युद्ध अपराध भएको बताएका हुन् ।

बाइडेनले अन्तर्राष्ट्रिय युद्ध अपराध अदालत तथा अन्य मानवतावादी संस्थाहरुबाट नरसंहारको छानविन गराउनु पर्ने र पुटिन तथा उनका सहयोगीहरु विरुद्ध युद्ध अपराधमा सजाय हुनुपर्ने बताएका हुन् ।

राष्ट्रपति बाइडेनले रुस विरुद्ध थप नाकाबन्दी लगाउने विषयमा गम्भीर बन्न गठबन्धन देशहरुलाई आग्रह पनि गरेका छन् ।

बुचामा भएको आम हत्याको संसार भरबाट निन्दा भइरहेको छ । पश्चिमा देशहरुले पनि बुचामा रुसी सैनिकले गैरसैनिक सर्वसाधारणको जथाभावी हत्या गरेको भन्दै स्वतन्त्र छानविनको माग गरेका छन् ।