पोखरामा डिजिटल प्रविधि प्रयोग गरी यौन व्यवसायमा संलग्न ३ जना फागुन तेस्रो साता पक्राउ परे । मानव बेचबिखनमा संलग्न भएको आरोपमा पक्राउ परेका तीन जना गत ६ चैतमा पुर्पक्षका लागि जिल्ला कारागार, कास्की चलान भएका छन् । न्यायाधीश श्रीकृष्ण भट्टराईको इजालसले सिन्धुपाल्चोककी २२ वर्षीया पूजा थापामगर, कास्कीका ३० वर्षीय नारायण पोखरेल र बाँकेका २२ वर्षीय विशाल योगीलाई गत हप्ता पुर्पक्षका लागि कारागार चलान गरेको हो ।

पोखरामा मिलेर अनलाइन यौन व्यवसाय गरिरहेका ६ मध्ये तीन जना पूजा, नारायण र विशाल सहकर्मीबाटै फसेका हुन् । यौन व्यवसायमा संलग्न २०७८ पोखरा–५८, पोखरा–५९ र पोखरा–६० (परिवर्तित नाम) सँगको मनमुटावपछि उनीहरू कारागार पुगेका हुन् ।

कारागार चलान भएकाहरू यौन व्यवसायका बिचौलिया हुन् । उनीहरू ग्राहकसँग बार्गेनिङ गरेर मन लागेको पैसा लिन्थे र युवतीलाई एक जना ग्राहकबापत चार हजार रुपैयाँ दिन्थे । नारायण, पूजा र विशालले पहिल्यै ग्राहकसँग पैसा लिएर वादी पक्षलाई ग्राहकले भनेकै ठाउँमा पु¥याउँथे ।

को ग्राहकसँग कति पैसा लिन्थे भन्ने युवतीहरूलाई पनि थाहा हुन्थेन । आफूहरूलाई थोरै पैसा दिएर तीन जनाले धेरै लिएको थाहा पाएपछि युवतीहरू बिच्किएका थिए । १४ फागुनमा पैसाको विषयले दुई पक्षबीच मनमुटाव भयो । त्यो दिन पूजाको फ्ल्याटमा चर्काचर्की परेको थियो । युवतीले आफ्ना कुरा राख्दा बेइज्जती गर्ने धम्की पूजाले दिएकी थिइन् । भनाभन भएर पूजाको फ्ल्याटबाट भागेकी १७ वर्षीय किशोरी जिल्ला प्रहरी कार्यालय, कास्की पुगेपछि घटना सार्वजनिक भएको हो ।

‘सोही फ्ल्याटमा ३ जना नचिनेका पुरुष व्यक्तिहरू बोलाई सो दिन पनि हामीसँग यौन सम्पर्क गर्न लगाएका र सो दिन निज पुरुष व्यक्तिहरूले हामीसँग यौनसम्पर्क राख्दाका क्रममा हामीले कति पैसा दिनुभएको छ भन्दा १०–१० हजार रुपैयाँ दिएका छौँ भनी खुलाएकामा निज नारायण पोख्रेलसमेतले हामीलाई जनही ४ हजारमात्र दिन लागेका हुँदा हामीले सो रकम नलिइकन सो स्थानबाट निस्किएर भागेका हौँ,’ पीडितको बयान छ ।

प्रहरीको अनुसन्धानले यौनधन्दा चलाउन पोखराको जरेबरमा फ्ल्याट नै लिएको खुलेको छ । लेकसाइडको जरेबरमा ३ वटा कोठा भएको फ्ल्याट लिएका थिए । त्यसबापत मासिक १२ हजार रुपैयाँ तिर्थे । त्यसबाहेक ग्राहकको आवश्यकताअनुसार घर, होटलसम्मै पु¥याइदिन्थे ।

प्रतिवादी पक्षले पैसाको कुरा नभई रिसिइबीले आफूहरूलाई फसाइएको दाबी गरेको छ । जाहेरवालीहरू पूजासँगै एकै फ्ल्याटमा भाडामा बस्ने गरेकामा झगडा गरी हिँडेका र सोही रिसिइबीले झुट्टा जाहेरी दिएको दाबी प्रतिवादी पक्षको छ । तीन जनालाई कारागार पु¥याउनेमध्ये दुई जना २०७८ पोखरा–५९ र ६० पूजाका साथी हुन् । पूजाले दिएको बयानअनुसार एउटै घरमा बसेर काम गर्ने सल्लाह भएपछि जरेबर बसुन्धरा मार्गको एउटा घर भाडामा लिएका थिए ।

सँगै बस्दा विवाद भएको र छोडेर गएपछि पूजाको चरित्र हत्यामा संलग्न थिए । ‘हामीबीच आपसी असमझदारीका कारण विवाद, झगडा भएकाले पक्राउ पर्नुभन्दा एक हप्ताअगाडि निजहरू फ्ल्याट छोडेर अन्तै बस्छौँ भनी गएका थिए । निज पीडितहरूले म्यासेन्जर ग्रुप बनाएर मेरो फोटो अपलोड गरी गालीगलौजका शब्द लेखेका कारण मैले निजहरूलाई फोन गरेर किन यसो गरेको, सल्लाह गर्न आऊ भनी बोलाएको थिएँ,’ पूजाले भनेकी छिन् । त्यो भेट घटना सार्वजनिक हुने अवस्थासम्म पुग्यो ।

धन्दाका नाइके नारायणले भने जाहेरी दिनेसँग आफ्नो चिनजान नै नभएको बयान दिएका छन् । आफूले लेकसाइड खहरेमा होटल चलाउँदा पूजालाई चिनेको उनको भनाइ छ । आफूले तीन महिनाअघि होटल छोडेपछि दुवैसँग कहिलेकाहीँ भेटघाट, कुराकानी हुने गरेको नारायणको बयान छ । पूजा र विशालसँग मिलेर यौनधन्दा चलाउने गरेको विषय उनले अस्वीकार गरेका छन् । विशालले पनि डेरा सँगसँगै भएकाले चिनजान भएको तर आफूले कसैलाई यौन धन्दामा नलगाएको बयान दिएका छन् ।

युवतीलाई ग्राहकसम्म लैजान प्रयोग गरिएको गाडी पनि प्रहरीले नियन्त्रणमा लिएको थियो । तर, त्यो ४८२४ नम्बरको रियो गाडी अर्कैको भएको खुलेको छ । लुइँटेल थरका एक व्यक्ति त्यो गाडी १५ माघमा पास गर्ने तयारीमा थिए । उनले ११ लाख रुपैयाँ चेक पनि दिएकोमा ११ माघमा बुबा बितेपछि गाडी पास गर्न पाएनन् । त्यतिबेला प्रतिवादी नारायणले उनको गाडी मागेर चलाएका थिए । नारायण पोखराको रामबजारबाट त्यही गाडीसँगै १५ फागुनमा पक्राउ परेका थिए ।

प्रतिवादी तीन जनाले कसुर इन्कार गरे पनि घटनास्थल मुचुल्का, परिवर्तित नाम, थर २०७८ पोखरा–५८, पोखरा–५९ र पोखरा–६० को संयुक्त जाहेरी दरखास्त हेरेर अदालतले धरौटीमा छोड्न अस्वीकार गरेको हो । सुरुमा १७ वर्षीया किशोरी १४ फागुन मध्यरातमा प्रहरीकहाँ पुगेपछि इन्स्पेक्टर मुकेश न्यौपानेको नेतृत्वमा चार जनाको टोलीले अनुसन्धान थालेको थियो । पछि २१ र २७ वर्षीया युवतीले पनि तीन जनाविरुद्ध जाहेरी दिएका थिए । कारागार चलान भएकालाई पूर्ण आदेशपछि १० देखि १५ वर्षसम्म जेल र ५० हजारदेखि एक लाख रुपैयाँसम्म जरिवाना हुनेछ ।

सम्बन्धित समाचार

पोखरामा डिजिटल माध्यमबाटै यौन धन्दाः कारबाट घरमै डेलिभरी