पोखरा ।    जिल्ला प्रहरी कार्यालय कास्कीले होली (फागु) पर्वलाई संयमित र आपसी सद्भावका साथ मनाउन आग्रह गरेको छ।

बिहीबार (भोली) परेको होली पर्वलाई लिएर आवश्यक सुरक्षाका तयारी पूरा गरेको जानकारी दिंदै कास्कीका प्रहरी नायव उपरीक्षक तथा प्रहरी प्रवक्ता सुन्दर तिवारीले उच्खृंखल गतिविधि नगर्न र मर्यादित तथा शान्तिपूर्ण तरिकाले होली मनाउन आग्रह गरेका हुन्।

गण्डक न्यूज सँग कूरा गर्दै प्रवक्ता तिवारीले भने – “सद्भाव साट्ने पर्वलाई अत्यन्त सावधानी र मर्यादित भएर मनाउनु हुन जिल्ला प्रहरी कास्की आग्रह गर्दछ, अन्यथा महिला तथा जो कसैलाई जबर्जस्ती रङ्ग दल्ने तथा लोला हान्ने कार्य गर्नु फौजदारी विरुद्धको कसुर हो।”

तिवारीले होली पर्वको दिन पोखराका ठाउँ-ठाउँमा सुरक्षा चेक प्वाइन्ट राखिने जानकारी दिंदै जबर्जस्ती लोला हान्ने तथा रंग दल्ने, हो–हल्ला गर्ने, जबर्जस्ती अमर्यादित गैरकानुनी र उच्छङ्खल व्यवहार गर्ने, मादक पदार्थ सेवन गरी सवारी चलाउने र मोटरसाइकलमा तीन जना सवार रहने सबैलाई कारवाही गरिने जानकारी दिए।