पोखरा। प्रेस चौतारी नेपालको आसन्न नवौ राष्ट्रिय महाधिवेशनको सुरक्षा व्यवस्थाबारे आयोजक कमिटीको तर्फबाट सुरक्षा व्यवस्थापन उपसमितिले कास्कीका सुरक्षा संयन्त्र प्रमुखहरुसँग छलफल गरेको छ ।

सम्भावित सुरक्षा चुनौती र महाधिवेशन स्थलसहित समग्र पोखरा क्षेत्रमा त्यसअवधिभर सुरक्षा दृष्टिकोणले उच्च सर्तकता बढाउन कास्कीका सिडिओ जयनारायण आचार्य, सहायक सिडिओ अनिल शाही, एसपी रमेश थापा, डिएसपी सुन्दर तिवारी, बैदाम डिएसपी चुनीमाया तामाङ र जिल्ला ट्राफिक प्रमुख अमृतबहादुर बस्नेतसँग उपसमिति संयोजक एवं चौतारी केन्द्रीय सदस्य एमबी आस्था मगरले प्रारम्भिक छलफल गरेका हुन् ।

छलफलमा जिल्ला प्रशासन कार्यालय कास्कीका सिडिओ जयनारायण आचार्यले महाधिवेशनमा स्वास्थ्य मापदण्ड अपनाउन आग्रह गरे । कार्यक्रम स्थल र बाहिरी क्षेत्रको सुरक्षा व्यवस्थापनमा प्रशासनबाट सहयोग गरिने सिडिओ आचार्यले प्रतिबद्धता जनाए ।

जिल्ला प्रहरी कार्यालय कास्कीका प्रमुख तथा एसपी रमेश थापाले महाधिवेशनमा सहभागी हुन आउने प्रतिनिधिलाई यहाँको स्थानीय नियमबारे पूर्व जानकारी गराउन सुझाव दिए । महाधिवेशनलाई भयरहित वातावरणमा सम्पन्न गराउनु प्रहरी प्रशासनको पनि दायित्व भएको सुनाउँदै पोखरा बाहिर ग्रामीण इलाकामा घुम्न जान चाहने प्रतिनिधिले जानकारी दिएर जान आग्रह गरे । जिल्ला ट्राफिक कार्यालय कास्की प्रमुख अमृतबहादुर बस्नेतले ट्राफिक व्यवस्थापनमा कुनै समस्या नहरने प्रतिबद्धता जनाए ।

सुरक्षा व्यवस्थापन उपसमिति संयोजक एमबी आस्था मगरले प्रहरी प्रशासनसँगको समन्वयमा सुरक्षा प्रबन्ध व्यवस्थित बन्नेमा आफू विश्वस्त रहेको सुनाए । छलफलमा आकस्मिक समन्वय उपसमिति संयोजक एवं प्रेस चौतारी कास्कीका सहसचिव ईश्वर देवकोटाले महाधिवेशनलाई व्यवस्थित र सभ्य रुपमा सम्पन्न गर्न जिल्लाका सुरक्षा संयन्त्रहरुको सहयोग अनिवार्य आवश्यक रहेको बताए ।

प्रेस चौतारी नेपालको नवौं महाधिवेशन यही फागुन २७ र २८ गते पोखरामा हुँदै छ । खुला तथा बन्द सत्रका कार्यक्रम सभागृह हलमा आयोजना हुनेछन् ।