काठमाडौं । अमेरिकी सहयोग परियोजना एमसीसी सम्झौताबारे छलफल गर्न सत्ता गठबन्धनको बैठक आज बस्दैछ ।

प्रधानमन्त्री निवास बालुवाटारमा आज बिहान १० बजे पाँचै दलको बैठक बस्ने बताइएको छ ।

एमसीसीको विषयलाई लिएर पाँचै दलबीच मत भिन्नता छ । नेपाली कांग्रेस एमसीसी पक्षमा छ भने नेकपा (माओवादी केन्द्र) र राष्ट्रिय जनमोर्चा विरोध गरिरहेका छन् ।

यस्तै, नेकपा (एकीकृत समाजवादी)ले संसद्मा पेश हुन नरोक्ने तर, संशोधन भएसम्म यसको पक्षमा नउभिने जनाएको छ । जनता समाजवादी पार्टी (जसपा)का संघीय परिषद् अध्यक्ष डा. बाबुराम भट्टराई पक्ष पारित गर्ने पक्षमा छ भने अध्यक्ष उपेन्द्र यादव पक्ष पारित गर्न नहुने पक्षमा देखिएको छ ।

प्रमुख प्रतिपक्ष नेकपा (एमाले)ले भने यसको विषयमा कुनै निर्णय गर्न सकेको छैन । यस विषयमा निर्णय गर्ने जिम्मामा शीर्ष नेताहरुलाई दिएको छ ।

आज बस्ने गठबन्धनको बैठकले निकास दिने गरी निर्णय गर्ने जनाइएको छ । आजै दिउसो १ बजे प्रतिनिधिसभाको बैठक पनि बस्न लागेको छ ।