काठमाडौं । अनलाईन मार्फत मोबाइल फोन मगाई रिसिभ गरे पश्चात अर्कैको घर देखाई फरार भएका एक युवकलाई प्रहरीले पक्राउ गरेको छ। काठमाडौं महानगरपालिका -६ सरस्वती नगर बस्ने सोलुखुम्बु, खुम्बु पासाङ ल्हामु गाउँपालिका ५ घर भएका १९ वर्षीय उर्गेन टासि शेर्पालाई बुधबार साँझ प्रहरीले पक्राउ गरेको हो ।

प्रहरीका अनुसार शेर्पाले काठमाडौं महानगरपालिका -७ चावहिलबाट अनलाईन मार्फत दुई थान आइफोन किन्ने भनी बौद्ध स्तुपा आसपास मोबाइल रिसिभ गर्छु भन्दै मोबाइल मगाएको र मोबाइल रिसिभ गरेपछि नजिकै रहेको घर देखाई पैसा लिएर आउँछु भनी भागेका थिए।

घटनाको जानकारी पश्चात महानगरीय प्रहरी वृत्त बौद्धबाट खटिएको प्रहरीको टोलीले शेर्पालाई नगद १४ हजार रुपैयाँ र ३ थान मोबाइल सहित पक्राउ गरेको हो ।

उनी उपर चोरी तथा डाँका सम्वन्धी कसूर अन्तर्गत काठमाडौं जिल्ला अदालतबाट ७ दिन म्याद थप अनुमति लिई आवश्यक अनुसन्धान शुरु गरिएको प्रहरीले जनाएको छ ।