काठमाण्डौ।  सत्तारुढ दल नेपाली कांग्रेसका प्रवक्ता डा. प्रकाशशरण महतले एमसीसी संसदमा पेस भए बहुमतका साथ पारित हुने दाबी गरेका छन् ।

बिहीवार पार्टी कार्यालय सानेपामा बसेको कार्यसम्पादन समितिको पहिलो बैठकपछि सञ्चारकर्मीसँगको कुराकानीमा प्रवक्ता महतले यस्तो बताएका हुन् । आजको बैठकमा स्थानीय निकायको चुनाव, भातृ सङ्गठनहरूको समयसीमा र एमसीसीको विषयमा चर्चा गरिएको उनले बताए । बैठकमा वक्ताहरूले एमसीसीलाई कसरी चाँडै निष्कर्षमा पुर्‍याएर टुङ्ग्याउने भन्ने कुरामा छलफल भएको जानकारी दिए।

यस्तै प्रधानमन्त्री तथा पार्टी सभापति शेरबहादुर देउवाले संक्षेपमा एमसीसीबारे लिखित सामग्री डा. महतसँग मागेका थिए । त्यसक्रममा एमसीसी विद्युत र सडकका लागि भएको कुरा जनमानसमा लैजानुपर्ने भन्दै डा. महतले लामो विवरण राखेका थिए ।

बैठकमा स्थानीय तहको निर्वाचन र गठबन्धनका विषयमा समेत छलफल भएको नेता शशांक कोइरालाले बताए । आफूले आगामी चुनावमा गठबन्धन गर्न नहुने धारणा राखेको उनले जानकारी दिए ।